Ғауез Нұрмұхамбетов Мүсірепов ауданындағы жол жөндеу жұмыстары мен ферма құрылысын тексерді
Солтүстік Қазақстан облысының әкімі жұмыс сапарымен Ғабит Мүсірепов атындағы ауданға барды. Сапар барысында ол инфрақұрылымдық және ауыл шаруашылығы жобаларының жүзеге асу барысымен танысты, деп хабарлайды QZ NEWS.
Негізгі назар Жезқазған – Петропавл республикалық трассасын жөндеуге аударылды. Бұл жолдың 60 шақырымнан астам бөлігі аудан аумағынан өтеді. Жыл соңына дейін екі учаскеде асфальт төсеу аяқталмақ. Жалпы ауданда ұзындығы 76 шақырымды құрайтын 13 жол жобасы іске асырылып жатыр. Жолдардың сақталуын қамтамасыз ету үшін көлік салмағын бақылайтын автоматтандырылған жүйелер орнатылуда – биыл қосымша тағы бес кешен орнату жоспарланған.
Сонымен қатар, облыс әкімі жергілікті ауыл шаруашылығы тауар өндірушілерінің табысты жұмысын атап өтті.
«Ишим Гарант» ЖШС қызметкерлерге арналған тұрғын үй салу жобасын сәтті жүзеге асырды. Ұқсас бастаманы қазір «Буденное СК» ЖШС қолға алуда. Барлық үйлер қажетті инженерлік инфрақұрылыммен қамтамасыз етіледі. Бұл ауылда қолайлы әрі лайықты тұрмыс жағдайын жасауға мүмкіндік береді», – деп жазды Ғауез Нұрмұхамбетов әлеуметтік желілерде.
Ефимовка ауылының маңында 1200 бас аналық ірі қараға арналған «Буденное СК» ЖШС-нің сүт-тауарлы фермасының құрылысы аяқталуға жақын. Кәсіпорынның жоспарланған қуаты жылына 10 мың тонна сүт өндіруді құрайды.
Жұмыс сапары аясында облыс әкімі ауданның бизнес өкілдерімен және ауыл шаруашылығы тауар өндірушілерімен кездесулер өткізді.
«Мемлекеттік қолдаудың бұрын-соңды болмаған шараларының арқасында биылғы өнім жақсы болды. Енді оны уақытылы әрі сапалы жинап алу қажет. Ауданда егін жинау науқаны белсенді жүргізілуде. Көпжылдық шөптерді есептегенде, жалпы жинау алаңы 700 мың гектардан асады», – деді өңір басшысы.
