Петропавл әкімі қаланы абаттандыруды жеке өзі тексерді

Петропавл әкімі Серік Мұхамедиев абаттандыру жұмыстарының барысын өз көзімен қадағалау үшін қалаға арнайы рейд жасады. Мұндай тексерістер айына бірнеше рет әртүрлі бағыттар бойынша өткізіліп, мәселелерге жедел әрекет етуге және жергілікті жерде тапсырмалар беруге мүмкіндік береді, деп хабарлайды QZ NEWS.

«Таза Қазақстан» республикалық акциясы аясында бірқатар маңызды бағыттарға ерекше назар аударылды:

• Апатты ағаштарды кесу және бұталарды қырқу.
• Жасыл желектерді қалыпқа келтіру.
• Ғимараттардың қасбеттерін абаттандыру.
• Жол жабынын жөндеу.
• Жарнамалық тақтайшаларды «Жарнама және тілдер туралы» заңнамаға сәйкестендіру.

«Мен үшін тек ұйымдастырылған рейдтер ғана емес, сонымен қатар жеке кешкі тексерістер де маңызды. Осылайша Петропавлдың тыныс-тіршілігін жақсырақ түсінуге және туындаған мәселелерге жедел әрекет етуге болады деп санаймын», – деп жазды қала әкімі әлеуметтік желілерде.

Абаттандыру жұмыстары — үздіксіз процесс екені атап өтілді. Жергілікті билік қаланы барша тұрғындар үшін таза, қолайлы әрі әдемі ету ісін жалғастыруға ниетті.