Белгілі журналист Ульяна Ашимова петропавлдық жастарға шеберлік сабағын өткізді

Qyzyljar Creative Center орталығында Петропавл қаласының студенттері мен оқушыларына арналған белгілі журналист Ульяна Ашимованың шеберлік сабағы өтті. Ол жастармен жеке әңгімелесу барысында кәсіби тәжірибесімен бөлісті, деп хабарлайды QZ News тілшісі.

Солтүстік Қазақстан облысының тумасы Ульяна Ашимова еңбек жолын өңірлік телеарнадан бастаған. Қазіргі таңда ол республикалық «Jibek Joly» арнасында кешкі жаңалықтардың жүргізушісі болып жұмыс істейді, сонымен қатар медиа саласындағы бірнеше жобамен айналысады.

Ульяна Петропавлға жастарға таңдаған мамандықтарының қыр-сырын түсіндіру үшін келді. «Медиа саласында қандай мамандықтар бар? Нағыз маман қандай құзыреттерге ие болуы тиіс? Республикалық БАҚ-қа қалай жол табуға болады? Диплом алған жас журналист не істеуі керек?» деген сұрақтарға ол кеңінен жауап берді.

«Мен студенттердің білімдерін қайда қолдана алатыны қатты қызықтыратынын түсіндім. Медиа – бұл үлкен әлем, ал осы мамандықты таңдаған әр адам өзін жүзеге асырып, кәсібінде шын мәнінде бақытты бола алады», – деді Ульяна Ашимова.

Ульяна тек өзінің өмірбаяны мен кәсіби тәжірибесімен бөлісіп қана қоймай, жастарға журналистиканың көп қырлы әлемін де ашып көрсетті.