Орташа жалақы қайта есептелді: ол Қазақстанда төмендеді
Аналитиктер өз статистикасына шағын бизнесті енгізді, соның нәтижесінде Қазақстандағы орташа жалақы стандартты көрсеткішпен салыстырғанда бірден 6,17%-ға азайды, деп хабарлайды QZ NEWS NUR.KZ-ке сілтеме жасап.
Екінші тоқсан қорытындысы бойынша Қазақстандағы орташа атаулы жалақы 448 620 теңгеге жетті. Алайда бұл соманың бірнеше ерекшелігі бар:
- барлық азаматтар мұндай табыс таппайды;
- есептеуде шағын бизнес пен шамамен 1,5 млн қазақстандықтың жалақысы ескерілмеген.
Енді Ұлттық статистика бюросы кәсіпкерлікпен айналысатын шағын кәсіпорындарды ескере отырып орташа жалақы туралы деректерді жариялады. Қорытынды сома бірден 6,17%-ға азайып, айына 420 922 теңгені құрады.
Бұл көрсеткіш тоқсан ішінде 5,4%-ға, жылына 9,8%-ға өсті. Алайда елдегі инфляцияны ескерсек, тоқсандық өсім бар болғаны 1,9%-ды, ал жылдық өсім теріс нәтиже көрсетті – минус 1,4%. Басқаша айтқанда, қазақстандықтардың нақты жалақысы жыл ішінде «құлдырады».
Аймақтар бойынша ең жоғары жалақы Маңғыстау облысында тіркелді – айына орта есеппен 575 082 теңге. Одан кейін Ұлытау облысы – 549 298 теңге және Атырау облысы – 544 679 теңге.
Алматыда шағын бизнес ескерілген орташа жалақы – 497 509 теңге, Астанада – 528 060 теңге, Шымкентте – небәрі 315 045 теңге. Ең төмен жалақы Солтүстік Қазақстан облысында – орташа 309 712 теңге.
Салалар бойынша ең жоғары жалақы қаржы және сақтандыру саласында – 892 822 теңге. Келесі орында ақпарат және байланыс секторы – 692 083 теңге, сондай-ақ кәсіби, ғылыми және техникалық қызмет – 553 308 теңге, өнеркәсіп саласы – 532 156 теңге.
Ең төмен жалақы орналастыру және тамақтандыру қызметтері саласында – айына 256 732 теңге, сондай-ақ ауыл шаруашылығы, балық және орман шаруашылықтарында – 281 228 теңге.
Айта кетейік, Қазақстанда орташа жалақыдан бөлек, медиандық жалақы да есептеледі. Ол «ортадағы» жұмыскердің табысын көрсетеді – яғни барлық қызметкерлерді жалақысына қарай тізіп қойғанда дәл ортасында тұрған жұмыскердің айлығы. 2025 жылы бұл көрсеткіш 300 307 теңгені құрады.