«Құлагер» хоккей клубының жоғалған команда басшысы Сергей Филь алаяқтық ісі бойынша СҚО-да ұсталды
Астананың 45 жастағы тұрғыны Сергей Филь Солтүстік Қазақстан облысының полицейлері тарапынан ұсталды. Ол екі немесе одан да көп адамға қатысты алаяқтық жасады деген күдікке ілінді, деп хабарлайды QZ NEWS.
Күдікті уақытша ұстау изоляторына қамалды. Ведомствоның баспасөз қызметінің мәліметінше, бұл дерек бойынша қылмыстық іс қозғалып, сотқа дейінгі тергеу жүргізілуде.
– Қазақстан Республикасының Қылмыстық-процестік кодексінің 201-бабына сәйкес, қылмыстың өзге де мән-жайлары тергеу мүддесіне байланысты жария етілмейді, – деп хабарлады СҚО полиция департаментінің баспасөз қызметі.
Еске салайық, «Құлагер» хоккей клубының команда басшысы Сергей Филь қыркүйек айының соңында жоғалып кеткен болатын. Ол алаяқтық жасады деген күдікке алынған. Сергей Филь өткен жылдың желтоқсан айынан бастап команда басшысы қызметін атқарған. Ресми түрде ол әлі де клуб қызметкері болып саналады. Соңғы рет онымен байланыс 24 қыркүйекте үзілген.
Сол уақытта әлеуметтік желілерде Челябі облысының полициясы іздеу жариялаған ер адамның суреті тараған. Орналастырылған хабарламадағы деректер «Құлагер» қызметкерінің мәліметтерімен өте ұқсас. Онда бойы екі метр шамасындағы, 1980 жылы туған ер адамның пәтерлерді жалға алып, иелерінің мүлкін ұрлайтыны айтылған. Іздеу хабарламасында аты-жөні — Сергей Владимирович Филь деп көрсетілген.
«Құлагер» хоккей клубының директоры Игорь Шерстов БАҚ-қа ресми түсініктеме берді. Оның айтуынша, Филь жұмыс істеген уақытында клуб әкімшілігі немесе құқық қорғау органдары тарапынан ешқандай шағым не күдік болмаған. Ол өзін жауапкершілігі жоғары, адал қызметкер ретінде танытқан және әріптестері мен хоккейшілер арасында құрметке ие болған.