Петропавлда Pizza Pitch тәжірибелі кәсіпкерлер алдында стартап-идеялар сайысы өтті
SKO Hub алаңы жас инноваторлар мен тәжірибелі кәсіпкерлердің кездесу орнына айналды. Мұнда жеті команда өз стартап-идеяларын сарапшыларға ұсынып, кері байланыс пен қолдау іздеді, деп хабарлайды QZ NEWS.
Pizza Pitch Петропавлда екінші рет өткізіліп отыр. Іс-шараны SKO Hub кәсіпкерлер клубы RB Club-тың қолдауымен ұйымдастырды. Басты мақсат – қатысушылар өз идеяларын таныстырып, бизнес пен технология саласындағы сарапшылардан кәсіби кеңес пен қолдау алатын орта құру.
Жобаларды төрт тәжірибелі сарапшы бағалады. Олардың қатарында RB Club негізін қалаушы Дмитрий Руппель, Astana Hub резиденті Даниил Инжеватов, сондай-ақ «Қазпошта» АҚ СҚО филиалының IT-блогының бұрынғы басшысы Елена Трифонова мен [RE]consult командасының негізін қалаушы, бизнес-кеңесші Александр Решетнёв бар.
Сарапшылар қатысушылардың жоғары дайындық деңгейін және ұсынылған идеялардың алуан түрлілігін – білім беру платформаларынан бастап жасанды интеллектке негізделген технологиялық шешімдерге дейін – ерекше атап өтті.
Pizza Pitch барысында өз жобаларын SAQ AI, PowerNode, eoku.kz, NIS Dreams, HelpMate, Delight, сондай-ақ бизнес пен мемлекеттік құрылымдарға арналған AI-шешімдер топтары таныстырды.
Ұйымдастырушылардың айтуынша, питчинг қорытындысы бойынша жеңімпаз атанғандар – Александр Кадуцкий мен Азиз Алим. Олардың PowerNode жобасы – жаңа буындағы модульдік портативті энергия жүйесі. Бұл жүйе кез келген жағдайда икемді әрі әмбебап қуат көзі бола алады.
Барлық командалар өңірдің инновациялық экожүйесін дамытуға қосқан үлесі үшін алғыс хаттармен марапатталды.
SKO Hub директоры Нұргүл Булатова атап өткендей, Pizza Pitch тек идеяларды таныстыру алаңы ғана емес, сонымен бірге шабыт, тәжірибе және ой алмасу орнына айналды. Ұйымдастырушылар мұндай кездесулер жастар арасында кәсіпкерлік ойлауды дамытуға серпін беретініне сенім білдірді.
