Петропавлдық спортшы Зарина Арасланова бочча бойынша Қазақстан Кубогында алтын медаль жеңіп алды
Петропавлдық спортшы Зарина Арасланова 9–14 қараша аралығында Астанада өткен бочча бойынша Қазақстан Кубогында алтын медаль иеленді. Жарысқа елдің барлық өңірінен 124 спортшы қатысты, деп хабарлайды QZ NEWS.
СҚО дене шынықтыру және спорт басқармасында атап өтілгендей, турнирде 15 жастағы Анна Смыкина да жоғары нәтиже көрсетіп, 5-орынға тұрақтады. Бочча — тірек-қимыл аппараты бұзылған спортшыларға арналған паралимпиадалық спорт түрі.
Петропавлда боччамен сегіз адам айналысады. Команданың жаттығу жағдайы айтарлықтай жақсарған: бұрын спортшылар интернаттың жертөлесінде және «Қарасай» спорт кешенінің дәлізінде жаттыққан болса, қазір жаттығулар аптасына үш рет “Береке” шағын ауданындағы жаңа дене шынықтыру-сауықтыру кешенінде өтеді.
Спортшылардың мақсаты ауқымды — 2028 жылы Лос-Анджелесте өтетін Паралимпиадаға қатысу және халықаралық жарыстарда медаль иелену.