Зорлық-зомбылыққа жол жоқ: Петропавлда отбасы әл-ауқатын қолдауға арналған әлеуметтік акция өтті
Петропавлда тұрмыстық зорлық-зомбылық мәселесі туралы халықтың хабардарлығын арттыруға және қиын өмірлік жағдайға тап болған азаматтарға көрсетілетін қолдау шараларын түсіндіруге бағытталған «Зорлық-зомбылыққа жол жоқ!» атты әлеуметтік акция өтті, деп хабарлайды QZ NEWS тілшісі.
Іс-шара «Қазақстан – отбасындағы зорлық-зомбылықсыз ел» республикалық айлығы аясында ұйымдастырылды.
Акцияны Петропавл қалалық Жастар ресурстық орталығы мен СҚО Полиция департаментінің Отбасылық-тұрмыстық зорлық-зомбылыққа қарсы күрес бөлімшесі бірлесіп өткізді. Негізгі алаң ретінде «Рахмет» сауда үйі таңдалғанымен, облыс орталығының адам көп шоғырланатын көшелерінде де жұмыстар жүргізіліп, еріктілер мен мамандар қала тұрғындарымен кездесті.
Акция барысында петропавлдықтарға қолдау қызметтерінің, кеңес беру орталықтарының және құқық қорғау органдарының байланыс мәліметтері көрсетілген ақпараттық буклеттер таратылды. Отбасындағы жанжалдар мен дағдарыстық жағдайлар туындаған кезде қайда жүгінуге болатыны түсіндірілді. Сонымен қатар, зорлық-зомбылыққа қарсы қозғалысты қолдаудың белгісі ретінде қатысушыларға өзара сыйластықтың, қауіпсіздік пен жауапкершіліктің маңызын еске салатын арнайы ленталар үлестірілді.
Ұйымдастырушылар профилактикалық жұмыстарға ерекше назар аударды. Қала көшелерінде қысқаша әлеуметтік сауалнама жүргізіліп, тұрғындардың отбасылық-тұрмыстық зорлық-зомбылық мәселесі, азаматтардың құқықтарын қорғау тетіктері мен қолжетімді қолдау шаралары туралы ақпараттану деңгейі анықталды. Сондай-ақ акция аясында тақырыптық жапсырмалар мен стикерлер таратылып, олар қала тұрғындарының автокөліктеріне жапсырылып, қоғам назарын зорлық-зомбылықтың кез келген түріне қарсы тұру қажеттігіне аударды.
Ұйымдастырушылардың айтуынша, мұндай шаралар халыққа маңызды ақпарат жеткізіп қана қоймай, қоғамда қатыгездікке және адам құқықтарының бұзылуына төзбеушілік көзқарасын қалыптастыруға ықпал етеді.
Қалалық Жастар ресурстық орталығының жетекшісі Дамир Әбдин отбасылық-тұрмыстық зорлық-зомбылықтың алдын алу бүкіл қоғамның қатысуын талап ететінін атап өтті.
– Отбасы қауіпсіздік, қолдау және сенім орнаған орта болуы тиіс. Біздің міндетіміз – адамдарға көмек бар екенін және әрбір азаматтың өз құқықтары мен қадір-қасиетін қорғауға құқығы бар екенін еске салу. Осындай акциялар мәселенің өзектілігін көрсетіп, тұрғындардың құқықтық сауаттылығын арттыруға және немқұрайлылықтың шешім бола алмайтынын түсіндіруге мүмкіндік береді, – деді Дамир Әбдин.
Полиция қызметкерлері де тұрғындарға көмекке жүгіну тәртібін түсіндіріп, зардап шеккендерді қорғаудың қолданыстағы тетіктері мен отбасында құқыққа қайшы әрекеттер жасағаны үшін қарастырылған жауапкершілік шаралары туралы ақпарат берді.
Ұйымдастырушылардың пікірінше, отбасылық-тұрмыстық зорлық-зомбылықпен күрес ауқымды ақпараттық-түсіндіру жұмыстарынсыз және азаматтық қоғамның белсенді қатысуынсыз мүмкін емес. Сондықтан мұндай акциялар отбасылық құндылықтарды нығайтуға, азаматтардың құқықтарын қорғауға және қауіпсіз әлеуметтік орта қалыптастыруға бағытталған профилактикалық жұмыстың маңызды бөлігі болып табылады.