Петропавлда «Green City Day» экоинтерактиві өтті

Петропавл қаласында Қазақстан Конституциясы көшесінде кезекті «Green City Day» экологиялық интерактиві ұйымдастырылды. Іс-шараға қала жастары мен белсенділері қатысты. Акцияның бастамашысы Қоғамдық даму және ақпарат орталығы болды, деп хабарлайды QZ News тілшісі.

Қатысушылар үш станция бойынша тапсырмалар орындады. Әр станцияның негізгі мақсаты – экологиялық сауаттылықты арттыру. Бірінші станция «Эко-викторина» деп аталды. Мұнда белсенділер экология, табиғатты қорғау және қоршаған ортаға ұқыпты қарау тақырыптарындағы сұрақтарға жауап берді. Екінші станция аясында қатысушылар «Планетаға арналған тілек ағашын» жасады. Олар табиғатты сақтау жөніндегі өз тілектерін қағаз жапырақтарға жазып, арнайы тақтаға ілді.

Іс-шараның қорытынды кезеңі «Контейнерлер бойынша сұрыптау» атты үшінші станция болды. Қатысушыларға қалдық түрлерін ажыратып, оларды тиісті контейнерлерге бөлу ұсынылды. Негізгі қалдық түрлері қатарында пластик, қағаз, шыны және металл болды.

«“Таза Қазақстан” бағдарламасы аясында қалдықтарды бөлек жинауды насихаттауға, ресурстарды үнемдеуге және халықтың экологиялық сауаттылығын арттыруға ерекше көңіл бөлінеді. Сондықтан станцияларда біз қоқысты дұрыс сұрыптауды үйретіп, қайта өңдеу мен энергияны үнемдеу туралы біліммен бөлісеміз. Сонымен қатар қаламыздың тұрақты дамуына арналған тілектерді бірге қалыптастырамыз», – деді Қоғамдық даму және ақпарат орталығының жастар бастамалары бөлімінің жетекшісі Анастасия Волкова.