Қызылжар ауданында қарттар айлығы аясында 3 мыңнан астам тұрғынға қайырымдылық көмек көрсетіледі

Қызылжар ауданында өткен жұмыс кеңесінде ауданның әлеуметтік-экономикалық дамуына қатысты негізгі мәселелер қаралды. Атап айтқанда, елді мекендерді санитарлық тазарту және қарттар мен мүгедектігі бар азаматтарды қолдауға арналған ауқымды онкүндікке дайындық барысы талқыланды, деп хабарлайды QZ NEWS.

Абаттандыру мәселесі ерекше бақылауда. Жиында айтылғандай, жыл басынан бері Қызылжар ауданында 598 сенбілік пен «Таза бейсенбі» акциясы ұйымдастырылған. Осы уақыт аралығында 29 мыңға жуық ағаш пен бұта отырғызылып, 23 заңсыз қоқыс орны жойылды.

Қол жеткізілген нәтижелерге қарамастан, ауылдық округ әкімдеріне тазалық пен тәртіпті сақтау жұмыстарын күшейту тапсырылды. Атап айтқанда, арамшөптерді шабу жұмыстарын жандандыру, балалар және спорт алаңдарының жағдайын бақылау, аумақтардың санитарлық тазалығын қамтамасыз ету және жолдарға ағымдағы жөндеу жұмыстарын жалғастыру қажет.

Сонымен қатар қарттар мен мүгедектігі бар азаматтарды әлеуметтік қолдауға арналған айлыққа дайындық мәселесі де қаралды. Бүгінде ауданда 8 081 зейнеткер және мүмкіндігі шектеулі 1 099 адам тұрады.

Айлық аясында бірқатар іс-шара өткізу жоспарланған. Атап айтқанда, 3 262 тұрғынға жалпы сомасы 7 миллион теңгеге жуық атаулы қайырымдылық көмек көрсетіледі. Бұдан бөлек, көмекке мұқтаж азаматтардың үйлеріне бару, медициналық тексерулер мен мәдени іс-шаралар ұйымдастыру, әлеуметтік ауыл шаруашылығы жәрмеңкелерін өткізу және дәстүрлі «Қамқорлық» акциясын ұйымдастыру көзделген.