Кемел Оспанов: «Таза Қазақстан» – бұл экологиялық бастамадан әлдеқайда ауқымды. Бұл – күнделікті жауапкершілік мәдениеті
«Таза Қазақстан» экологиялық бастамасы қарапайым сенбіліктер аясынан әлдеқашан шығып, жалпыұлттық қозғалысқа әрі қазақстандықтардың саналы таңдауы мен ұстанымына айналды. «Қоғамдық келісім» мекемесінің басшысы Кемел Оспановтың айтуынша, бұл жоба күнделікті жауапкершіліктің жаңа мәдениетін қалыптастырып келеді, деп хабарлайды QZ NEWS.
Бұған дейін Қазақстан Республикасының Президенті Қасым-Жомарт Тоқаев «Таза Қазақстан» бағдарламасының шын мәнінде халықтық сипат алғанын, оның азаматтардың тәртіп пен тазалықта өмір сүруге деген ұмтылысын көрсететінін атап өткен болатын.
«Қаланың тазалығы қарапайым нәрселерден басталады: артыңнан қоқыс қалдырмау, қоршаған ортаға ұқыпты қарау, аулада және көшеде тазалық сақтау. Тазалық бір реттік акцияның нәтижесі емес, күнделікті әдетімізге айналуы керек. Өйткені қаламыздың қандай болатыны әрқайсымызға байланысты», – деп атап өтті Кемел Оспанов.