Kozybayev University бір жылдық жұмысын қорытындылап, даму жоспарларын таныстырды
Kozybayev University 2025–2026 оқу жылындағы жұмыс қорытындылары мен алдағы даму жоспарларын таныстырды. «Біз қалыптастыратын сенім» атты ашық диалогқа Директорлар кеңесінің мүшелері, оқытушылар, серіктестер және бұқаралық ақпарат құралдарының өкілдері қатысты, деп хабарлайды QZ NEWS тілшісі.
Университет басшылығының қоғаммен кездесуінде басқару ашықтығы, түлектердің еңбек нарығындағы сұранысқа ие болуы және қолданбалы ғылым мәселелері басты назарда болды.
Қазіргі уақытта Kozybayev University-де 8 064 студент білім алады. Ал өткен жылы олардың саны 6 493 болған. 2026 жылы жоғары оқу орнына 3 187 бірінші курс студенті қабылданды. Бұл – 2004 жылдан бергі ең жоғары көрсеткіш. Білім беру 161 бағдарлама бойынша жүргізіледі.
Директорлар кеңесінің төрағасы Ғалым Байтоқ университеттің өңірді білікті мамандармен қамтамасыз етуде маңызды рөл атқаратынын атап өтті.
«Университет диплом алатын орын ғана емес, өңірдің даму орталығы болуы керек. Мұнда ғылым мен өндіріс тоғысады, ал зерттеу нәтижелері нақты шешімдерге айналуы тиіс», – деп атап өтті ол.
Есепті кезеңнің қорытындысы бойынша түлектердің 91 пайызы жұмысқа орналасқан. Өткен жылы бұл көрсеткіш 84 пайыз болған. Жұмыс берушілердің мамандарды даярлау сапасына қанағаттану деңгейі де 77 пайыздан 88 пайызға дейін өсті. Дуалды оқыту жүйесі де кеңейіп келеді. Қазір оған 764 студент қатысады, ал тиісті білім беру бағдарламаларының саны бестен 24-ке дейін артты.
Кездесуде басқару жүйесінің ашықтығына да ерекше назар аударылды. 2025 жылы Директорлар кеңесі 11 отырыс өткізіп, 120-дан астам шешім қабылдаған. Биыл алғаш рет Кеңес қызметіне тәуелсіз бағалау жүргізіліп жатыр.
«Егер біз университеттен ашықтықты талап етсек, оны алдымен өзімізден бастауымыз керек. Өз жұмысымыздың тиімділігін тексеріп, нәтижелерін ашық түрде ұсыну біз үшін маңызды. Сенімді талап ете алмайсың, оған тек лайық болуға болады», – деді Ғалым Байтоқ.
Ғылымды қаржыландыру көлемі де айтарлықтай өсті. 2025–2026 оқу жылында Қазақстан Республикасы Ғылым және жоғары білім министрлігі желісі бойынша зерттеулерге 1,31 миллиард теңге бөлінді. Бұл – 2024 жылмен салыстырғанда 3,5 есе көп. Ғылыми жұмыстарға кәсіпорындар да тартылып жатыр. Облыстық ғылыми кеңестің қызметіне 81 ұйым қатысады, сондай-ақ жеті өңірлік ғылыми консорциум құрылған.
Зерттеулер Солтүстік Қазақстан облысының нақты мәселелерін шешуге бағытталған. Олардың қатарында су ресурстарын бақылау және тазарту, азық-түлік қауіпсіздігін қамтамасыз ету, бидай селекциясы мен агротехнологияларды дамыту бар.
Ірі жобалардың бірі – Қазақстан-Қытай агротехнологиялар және экспортты дамыту демонстрациялық технопаркі. Жобаны екі кезеңмен жүзеге асыру аясында үш жыл ішінде 50 миллион долларға дейін инвестиция тарту көзделген.
«Зерттеу тақырыптары өңірдің нақты сұраныстарынан туындайды. Мәселені жергілікті атқарушы орган немесе кәсіпорын көтереді. Содан кейін біз ғалымдарды, студенттерді және серіктестерді біріктіреміз. Осылайша ғылым өңірдің нақты міндеттерін шешудің құралына айналады», – деді университеттің Басқарма төрағасы – ректор Ербол Исақаев.
Халықаралық ынтымақтастық та жалғасып келеді. Қазіргі уақытта университетте 22 елден келген 483 шетелдік студент білім алады. Аризона университетімен бірлескен қос дипломды алты бағдарлама бойынша 475 студент оқиды. Бірлескен бағдарламаның алғашқы 31 түлегі Қазақстан мен АҚШ дипломдарын алды.
Ректор алдағы уақытта университет студенттерінің санын сегіз мыңнан жоғары деңгейде сақтап, тағы 400 шетелдік білім алушыны тартуды және өңір кәсіпорындарымен ынтымақтастықты кеңейтуді жоспарлап отырғанын айтты.
Кездесу соңында қатысушылар жаңа оқу-зертханалық корпустың жанында «Таза Қазақстан» аллеясын ашты. Мұнда шырша, жөке және сирень секілді 120 ағаш пен бұта отырғызылды. Жоба «Еуразиялық банк» АҚ-ның демеушілік қолдауымен жүзеге асырылып, Республика күніне орайластырылды.
География және экология кафедрасының профессоры Павел Дмитриев жаңа аллеяны университеттің экологиялық мәдениетті дамытуға қосқан үлесі деп бағалады.
«Бұл – экологиялық және эстетикалық тұрғыдан ғана емес, жас ұрпаққа патриоттық тәрбие беруге де қосылған үлес», – деп атап өтті ол.