Жол қауіпсіздігін еске салудың тың тәсілі: СҚО-да арнайы хабарламасы бар 5 мың кофе стақаны дайындалды

Солтүстік Қазақстан облысында жол қозғалысы ережелерін адамдар күтпеген жерден – кофе стақандарынан еске салуды ұйғарды. «Заң және тәртіп» тұжырымдамасы аясында тақырыптық бейнероликке сілтеме жасайтын QR-коды бар 5 мың стақан дайындалды. Жоба полиция мен жергілікті кәсіпкерлердің бірлескен бастамасы болды, деп хабарлайды QZ NEWS тілшісі.

Стақандарға коммерциялық жарнаманың орнына жолда абай болуға шақыратын үндеулер мен арнайы QR-код орналастырылды. Оны смартфон камерасымен сканерлеп, Instagram желісіндегі бейнероликке өтуге болады. Онда жол қозғалысына қатысушыларға мұқият болу және ережелерді сақтау қажеттігі ескертіледі.

Бастамаға бюджеттен қосымша қаражат бөлінген жоқ. Жергілікті кәсіпкерлер идеяны қолдап, стақандарды дайындау шығындарын өз мойнына алды. Полиция өкілдерінің пікірінше, мұндай профилактикалық тәсіл маңызды ақпаратты адамдарға күнделікті өмірде үйреншікті ортада жеткізуге мүмкіндік береді.

СҚО Полиция департаменті Әкімшілік полиция басқармасының бастығы Алтынбек Жамалиев акция үшін кофе стақандарының таңдалу себебін түсіндірді.

«Кофе көптеген адамның күнделікті өмірінің бір бөлігіне айналғанын байқадық. Жүргізушілер де жолға шығар алдында сусын алу үшін жиі тоқтайды. Сондықтан осы сәтті жол-көлік оқиғаларының алдын алу мақсатында пайдалануды ұйғардық. Стақандарға жол қауіпсіздігі туралы ескертулер мен арнайы бейнероликке апаратын QR-код орналастырылды», – деді ол.

Ұйымдастырушылардың ойынша, акция тек автокөлік жүргізушілерін ғана емес, жаяу жүргіншілер мен жастарды да қамтуы тиіс. Бейнеролик жол қауіпсіздігі әрбір қозғалысқа қатысушының іс-әрекетіне байланысты екенін еске салады.

Ерекше формат Петропавл тұрғындарының назарын аударып үлгерді. Алдияр Көшербаев кофе сатып алу кезінде стақандағы QR-кодты байқап қалған. Безендірілуіне қызығушылық танытып, сілтеме арқылы өтіп, онда не жасырылғанын көруді ұйғарған.

«Кофе алуға кіріп, ерекше безендірілген стақанды көрдім. QR-кодты сканерлеп, Instagram желісіндегі бейнероликті тамашаладым. Онда жолда сақ болудың маңыздылығы айтылған. Менің ойымша, бұл – жол-көлік оқиғаларын азайтуға және жүргізушілердің мұқият болуына көмектесетін пайдалы бастама», – деді қала тұрғыны.

Профилактикалық бастама өңірдегі жол-көлік оқиғалары санының азаюы аясында қолға алынды. Биылғы жылдың тоғыз айында Солтүстік Қазақстан облысында 430 жол-көлік оқиғасы тіркелген. Ал өткен жылдың сәйкес кезеңінде 480 апат болған.

Қаза тапқандар саны да азайған. Былтыр тоғыз айда облыс жолдарында 47 адам көз жұмса, биыл бұл көрсеткіш 30 адамды құрады. Яғни, қаза тапқандар саны 17 адамға азайған.

Полиция өкілдері оң көрсеткіштерге құқық қорғау органдарының, қоғамның, бұқаралық ақпарат құралдарының және профилактикалық шараларға қатысатын өзге де тараптардың бірлескен жұмысы ықпал еткенін атап өтті.

Жаңа акция жол қауіпсіздігіне назар аудартудың тағы бір тәсіліне айналды. Ұйымдастырушылар стақандардағы QR-кодтар адамдарға жолда абай болу мен жауапкершіліктің маңызын еске салады деп үміттенеді. Бұл талап көлік жүргізушілеріне де, жаяу жүргіншілерге де қатысты.