«Ботай — Ұлы дала мәдениеті»: Солтүстік Қазақстан облысында бірегей мұраның болашағы талқылануда
Солтүстік Қазақстан облысында «Ботай — Ұлы дала мәдениеті» III Халықаралық симпозиумы өтіп жатыр. Ғауез Нұрмұхамбетовтың атап өтуінше, өңір үшін алдыңғы қатарлы археологтарды, тарихшыларды, мәдениет қайраткерлері мен әр елден келген ғылыми қауымдастық өкілдерін қабылдау – зор мәртебе, деп хабарлайды QZ NEWS.
Симпозиум аясында «Ботай — Ұлы дала мәдениеті» халықаралық ғылыми-тәжірибелік конференциясы өтті. Онда Ботай мұрасын жан-жақты зерттеу және насихаттау, туристік инфрақұрылымды дамыту, білім беру бастамалары мен халықаралық ынтымақтастықтың болашағы талқыланды.
Симпозиум жұмысына Премьер-Министрдің орынбасары Ермек Көшербаев, Ғылым және жоғары білім министрі Саясат Нұрбек, Туризм және спорт вице-министрі Ержан Еркінбаев, Мәдениет және ақпарат вице-министрі Евгений Кочетов, сондай-ақ Түркі мәдениеті мен мұрасын халықаралық қорының өкілдері қатысты. Аталған қор симпозиумның жоғары деңгейде өтуіне елеулі қолдау көрсетті. Бұл – мәдени туризмді дамыту және елдің тарихи-ғылыми әлеуетін сақтау мәселелеріне жоғары деңгейде мән беріліп отырғанының айқын дәлелі.
Симпозиум қатысушылары Петропавлдағы бірқатар маңызды нысандарды аралады. Солардың ішінде облыс орталығының кіреберісінде орнатылған Ботай ескерткіші бар. Бұл монумент қаладағы жаңа көрікті орынға айналып, Ботай мәдениетінің әлемдік өркениет бастауларының бірі ретіндегі бірегейлігі мен маңызын айқындай түседі.
«Ботайды ғылыми, туристік және ағартушылық орталық ретінде дамыту бойынша жүйелі жұмыс жалғасуда. Қазір «Ботай. Жоғалған әлем» атты көркем фильмнің түсірілімі басталды. Бұл туынды Ботай мәдениетінің бірегей тарихи-мәдени мәнін тереңірек ашып, оған кең аудиторияның назарын аударуға мүмкіндік береді. Сондай-ақ Айыртау ауданында облыстың агроөнеркәсіптік кешені үшін маңызды жоба – құрғақ бие сүтін өндіретін зауытты іске қосуға дайындық жұмыстары жүргізілуде», – деп жазды СҚО әкімі әлеуметтік желідегі парақшасында.
