«Ардос-Жүрек» МБ басшысы Ақжан Кәрім Мемлекет басшысының тапсырмаларының СҚО тұрғындары үшін маңыздылығын бағалады
Әлеуметтік бастамаларды жүзеге асыру, жол инфрақұрылымын дамыту және халықтың табысын арттыру. «Ардос-Жүрек» мүгедектер бірлестігі директоры Ақжан Кәрім Қазақстан Президенті Қасым-Жомарт Тоқаевтың Жолдауындағы осы бағыттарды аса маңызды деп санайды. Солтүстікқазақстандықтың пікірінше, ерекше қажеттіліктері бар балаларға оңалту көмегінің қолжетімді болуына айрықша назар аудару қажет. Бұл туралы QZ NEWS тілшісі хабарлайды.
Қоғамдық бірлестік басшысы үшін әлеуметтік қолдау мәселелерінің маңызы ерекше. Сондықтан Мемлекет басшысы ұсынған бастамалардың ішінде Ақжан Кәрім ең алдымен Жалпыхалықтық құрылыс жылы аясында әлеуметтік инфрақұрылымды дамыту жоспарына назар аударды. Мұнда әңгіме тек жаңа нысандар салу туралы емес, адамдардың күнделікті өмір сүру сапасын жақсартуға мүмкіндік беретін жағдайлар жасау жөнінде болып отыр.
Спикер әсіресе мүгедектігі бар балаларға арналған оңалту орталықтарын салу мәселесін өзекті санайды. Бүгінде көптеген отбасы қажетті көмекті өз өңірінен тыс жерлерден іздеуге мәжбүр. Бұл қосымша шығындарға, тұрмыстық қиындықтарға және үйреншікті өмір салтын ұзақ уақытқа өзгертуге әкеледі.
«Отбасында ерекше қажеттіліктері бар бала тәрбиеленсе, ата-ананың онсыз да шешетін мәселелері аз емес. Ал оңалту қызметін алу үшін басқа қалаға бару қажет болса, бұл жүктеме одан әрі артады. Менің ойымша, отбасының қай жерде тұратынына қарамастан, көмек баршаға қолжетімді болуы керек. Әрбір бала өзіне қолайлы жағдайда дамуға, мамандардың қолдауын алуға және нәтижеге қол жеткізуге мүмкіндік алуы тиіс», – дейді Ақжан Кәрім.
Көлік мәселесі де назардан тыс қалмады. Президенттің Солтүстік Қазақстан облысы үшін маңызды тапсырмаларының қатарында спикер Көкшетау – Петропавл автожолын кеңейтуді атады. Оның айтуынша, бұл жолдың жағдайы мен өткізу қабілеті өңірдің көптеген тұрғыны үшін маңызды. Әсіресе жұмыс бабымен қалалар арасында жиі қатынайтын азаматтарға қатысы бар.
«Мен бұл жолмен өзім де жиі жүремін. Сондықтан жүргізушілердің кейде қандай қиындықтарға тап болатынын жақсы білемін. Тар жолда барынша мұқият болуға тура келеді, ал сапарға қосымша уақыт жұмсалады. Жолдың төрт жолақты болуы жағдайды айтарлықтай өзгертер еді. Бұл тек қолайлылық мәселесі емес, сонымен қатар осы бағытпен күн сайын қатынайтын адамдардың қауіпсіздігіне де тікелей қатысты», – деп атап өтті сұхбаттасушы.
Қоғамдық бірлестік басшысы Жолдауда ерекше атап өткен тағы бір маңызды мәселе – ең төменгі жалақы мөлшерін қайта қарау. Оның 85 мың теңгеден 110 мың теңгеге дейін көтерілуін Ақжан Кәрім мемлекеттің әлеуметтік саясатындағы маңызды қадам деп бағалайды. Сонымен қатар оның пікірінше, экономикалық шешімдер түптеп келгенде халықтың нақты табысы мен өмір сүру сапасына оң әсер етуі тиіс.
Ақжан Кәрім әлеуметтік бастамалардың нәтижесі ең алдымен олардың халық өміріне қаншалықты оң ықпал ететінімен өлшенуі керек деп есептейді. Жаңа мекемелер, сапалы жолдар мен лайықты табыс – дамудың жай ғана көрсеткіштері емес, азаматтар күнделікті өмірде сезінетін нақты өзгерістер. Оның пікірінше, Жолдауда белгіленген міндеттердің орындалуын бағалауда дәл осы нәтиже басты өлшем болуы тиіс.