30 жыл күткен жол, жаңа сүт фермасы және цифрлық музей: СҚО-дағы Тимирязев ауданы қалай өзгеріп жатыр

Солтүстік Қазақстан облысының Тимирязев ауданында маңызды инфрақұрылымдық жобалар аяқталып, ауыл шаруашылығы дамып, заманауи технологиялар енгізілуде. Мұнда республикалық маңызы бар 45 шақырым жол жөнделіп, алғашқы тауарлы-сүт фермасы салынды. Мектептер мен медициналық мекемелер де жаңартылды. Ауданда тағы қандай өзгерістер болып жатқанын QZ NEWS тілшісі баяндайды.

Солтүстік Қазақстан облысының әкімі Ғауез Нұрмұхамбетовтің жұмыс сапары аясындағы басты оқиғалардың бірі – «Волошинка – Сергеевка – Тимирязево» автожолын орташа жөндеу жұмыстарының аяқталуы болды. Жергілікті тұрғындар үшін бұл кезекті жол жобасы ғана емес, 30 жыл бойы күткен маңызды оқиға. Аталған жол аудан үшін айрықша маңызға ие. Онымен ауыл тұрғындары, ауыл шаруашылығы тауарын өндірушілер, жүк тасымалдаушылар мен автокөлік жүргізушілері қатынайды.

Жұмыстың орындалу мерзімі де ерекше назар аудартады. Бастапқыда екі жылға жоспарланған жөндеу небәрі 11 айда аяқталды. Енді жүргізушілер бұрынғы қолайсыздықтардың орнына жаңартылған жолмен қатынайды. Ал тұрғындар үшін өзге елді мекендермен көлік қатынасы анағұрлым жайлы әрі қауіпсіз бола түсті.

«Жол дегеніміз – жай ғана асфальт төселген шақырымдар емес. Бұл – адамдардың жұмысқа, оқуға және медициналық мекемелерге жылдам жетуіне, кәсіпкерлердің өз ісін дамытуына, ал ауыл шаруашылығы тауарын өндірушілердің өнімдерін уақытылы жеткізуіне мүмкіндік. Әсіресе бұл жолды тұрғындардың 30 жыл күткені маңызды. Ауылдық жерлердегі өмір сапасын жақсарту бағытында жүйелі жұмыс жүргізуіміз керек», – деді облыс әкімі Ғауез Нұрмұхамбетов.

Аграрлық секторда да ауқымды өзгерістер жүзеге асуда. Солтүстік Қазақстан облысы дәстүрлі түрде еліміздегі жетекші ауыл шаруашылығы өңірлерінің бірі саналады. Сондықтан мал шаруашылығын дамыту, жаңа өндіріс орындарын ашу және жергілікті шаруашылықтардың мүмкіндіктерін кеңейтуге ерекше мән беріліп отыр.

Ақжан ауылында «Райт АА» ЖШС бүкіл Тимирязев ауданы үшін жаңа даму нүктесіне айналуы мүмкін жобаны жүзеге асыруда. Мұнда алғашқы тауарлы-сүт фермасы салынды. Мемлекеттік қолдау мен жеңілдетілген бағдарламалардың арқасында шаруашылық голштин тұқымды 400 бас ірі қара сатып алған. Кешенді 2027 жылдың бірінші тоқсанында іске қосу жоспарланып отыр.

Мұндай кешеннің ашылуы сүтті мал шаруашылығын дамытып қана қоймай, ауыл экономикасына да тың серпін береді. Осындай жобалар өндіріс көлемін арттыруға, инвестиция тартуға және жаңа жұмыс орындарын ашуға мүмкіндік жасайды. Сонымен қатар ветеринариялық инфрақұрылымды дамытуға да көңіл бөлінуде. Дмитриевка, Степное және Ақжан ауылдары үшін ветеринариялық пункттер сатып алынған.

Жұмыс сапарының тағы бір бөлігі әлеуметтік салаға арналды. Өйткені ауданның дамуы тек жаңа жолдар мен өндіріс нысандарымен ғана өлшенбейді. Адамдардың қаншалықты жайлы өмір сүретіні, медициналық көмек пен білімді тұрғылықты жеріне жақын маңнан алу мүмкіндігі де маңызды.

Аудандық аурухана мен бір ауысымда 150 адамды қабылдайтын емханада 2025 жылы күрделі жөндеу жұмыстары аяқталды. Білім беру мекемелерін жаңғырту жұмыстары да жалғасуда. «Қазақстан халқына» қоры мен Білім беруді тұрақты дамыту қорының қолдауының арқасында бірден төрт мектепте – Ақсуат, Докучаев, Москворецк және Тимирязев мектеп-гимназиясында заманауи оқу кабинеттері ашылды.

Енді оқушылар пәндерді заманауи құрал-жабдықтар мен технологияларды, соның ішінде жасанды интеллект элементтерін пайдалана отырып меңгере алады. Бұл әсіресе ауыл балалары үшін маңызды. Өйткені оларға да ірі қалалардағы құрдастарымен бірдей білім алуға және болашақ мамандығын таңдауға мүмкіндік берілуі тиіс.

Өңір басшысы барған тағы бір нысан – Тимирязеводағы аудандық IT орталық. Мұнда ауыл жастары цифрлық шешімдермен танысып, тәжірибелік дағдыларын дамытып, заманауи бағыттарда өз қабілеттерін сынай алады. Сонымен қатар орталықта облыстағы екінші цифрлық музей ашылған. Заманауи технологиялар туған өлкенің тарихына жаңаша көзқараспен қарауға, оны жас ұрпақ үшін қолжетімді әрі қызықты етуге мүмкіндік береді.

Мұндай бастамалар цифрландыру үдерісінің ірі қалалармен шектелмейтінін көрсетеді. Бүгінде аудан орталығының өзінде білім беру, технология және тарихи мұраны сақтау бағыттарын тоғыстыратын алаңдар қалыптастыруға болады.

Сапар барысында Ғауез Нұрмұхамбетов еңбек ардагері Ольга Скобамен, «Ауыл аманаты» бағдарламасына қатысушылармен, ауыл шаруашылығы тауарын өндірушілермен және аудан тұрғындарымен де кездесті. Кездесуде ауылдық елді мекендерді дамыту, кәсіпкерлікті қолдау, жергілікті бастамаларды жүзеге асыру және инфрақұрылымды одан әрі жаңарту мәселелері талқыланды.

«Әр жобаның артында адамдар, олардың күнделікті тұрмысы, еңбегі мен үміті тұр. Сондықтан жаңа нысандар салып, ашумен ғана шектелмей, тұрғындардың пікірін тыңдап, қажеттіліктерін түсініп, бірлесе шешім табу маңызды. Ауылдық елді мекендердің даму әлеуеті болуы керек. Ал жастардың осында қалып, еңбек етуге, отбасын құруға және өз идеяларын жүзеге асыруға деген ынтасы болғаны жөн», – деп атап өтті өңір басшысы.

Жұмыс сапары Тимирязев ауданының дамуы жол құрылысы мен ауыл шаруашылығынан бастап, медицина, білім беру және цифрландыруға дейінгі бірнеше бағытты қамтитынын көрсетті. Олардың әрқайсысының артында ауыл тұрғындарының өмірін біртіндеп өзгертіп жатқан нақты жобалар бар. Егер бұрын тұрғындардың басты арманы 30 жыл бойы жөнделуін күткен жол болса, бүгінде ауданда болашаққа жаңа мүмкіндіктер ашатын даму нүктелері қалыптасып келеді.