Петропавлда гараждардың орны абаттандырылмақ
Петропавлда қала аумағына заңсыз орнатылған темір гараждарға қатысты жұмыстар жалғасып жатыр. Кезекті рейд полиция қызметкерлері мен қоғам белсендісінің қатысуымен Брусиловский және Амангелді көшелерінің қиылысында, су мұнарасының маңында өтті. Мұнда темір конструкциялардың заңдылығы ғана емес, аумақтың болашақта қандай мақсатта пайдаланылатыны да талқыланды. Бұл туралы QZ NEWS тілшісі хабарлайды.
Темір гараждар қала көрінісінің үйреншікті бөлігіне айналған. Бірі тұрғын үйлердің маңында орналасса, енді бірі қоғамдық қажеттілікке пайдалануға болатын жерлерді алып жатыр. Уақыт өте келе мұндай нысандар қараусыз қалған аумақтарға айналып, олардың заңдылығы мәселесі де түпкілікті шешімін таппай келеді.
Рейд барысында қалалық полиция басқармасы қоғамдық қауіпсіздік бөлімінің қызметкерлері қоғам белсендісі Мәлік Шигабутдиновпен бірге су мұнарасының маңындағы аумақты тексерді. Тұрғындарға абаттандыру ережелерін сақтау қажеттігі ескертілді. Сондай-ақ бұған дейін иелеріне гараждарды көшіру туралы бірнеше рет хабарлама берілген нысандардың жайы талқыланды. Алайда олардың кейбірі әлі күнге дейін орнынан алынбаған.
Мәлік Шигабутдиновтің айтуынша, бұл аумақтың бастапқы мақсаты мүлде басқа. 2023 жылы әзірленген егжей-тегжейлі жоспарлау жобасына сәйкес, мұнда скверлер мен саябақтардан тұратын жасыл аймақ қарастырылған.
«Бұл темір гараждар заңсыз орнатылған. Егер жоба бойынша мұнда скверлер мен шыршалар болуы керек болса, солай болуы тиіс. Аумақты ретке келтіріп, адамдардың емін-еркін демалып, серуендеп, уақыт өткізуіне жағдай жасау қажет. Қалалық кеңістік өз бетінше орнатылған конструкциялармен емес, баршаға қолжетімді болуы керек», – деп есептейді қоғам белсендісі.
Ал гараждарды орналастыру және бөлшектеу мәселелері жергілікті атқарушы органдардың құзыретіне жатады. Полиция профилактикалық жұмыстарға қатысып, тұрғындармен байланыс орнатады, заң талаптарын түсіндіреді және қоғамдық тәртіпті қадағалайды. Қалалық полиция басқармасында атап өткендей, қызметкерлер өз өкілеттіктері аясында әрекет етеді.
Мәселенің ауқымын статистикалық мәліметтер де көрсетеді. Жыл басынан бері Солтүстік Қазақстан облысында абаттандыру ережелерін бұзудың 13 мыңнан астам дерегі анықталған. Оның бес мыңға жуығы Петропавл қаласында тіркелген.
Әрбір санның артында қаладағы нақты мәселелер тұр. Олардың қатарында қоқысқа толған аумақтар, тиісті деңгейде күтіп ұсталмайтын жерлер және өз бетінше орналастырылған нысандар бар. Мұндай олқылықтарды жою әрдайым бір рейдпен немесе ескертумен шектеле бермейді.
«Таза Қазақстан» бастамасы ортақ кеңістікке деген көзқарасты өзгертуге бағытталған. Өйткені таза әрі көрікті қала дегеніміз – тек қоқыстың болмауы емес. Бұл – жайлы тротуармен жүру, скверде демалу, темір конструкциялардың үйіндісінің орнына жайқалған ағаштарды көру мүмкіндігі.