Kozybayev University құрама командасы Қазақстанның XIII жазғы Универсиадасын сәтті бастады

Kozybayev University құрамасы Түркістанда өтіп жатқан Қазақстан Республикасының XIII жазғы Универсиадасында сәтті өнер көрсетті. Бұл ауқымды спорттық шарада еліміздің 75-тен астам жоғары оқу орындарының өкілдері бақ сынауда, деп хабарлайды QZ News университеттің баспасөз қызметіне сілтеме жасап.

Бәсекенің алғашқы күнінде Kozybayev University жеңіл атлеттері алғашқы жүлделерді еншіледі. Елена Берлина, Арина Мозгунова, Юлия Крец және Юлия Безушко құрамындағы қыздар эстафеталық командасы (4×100 м) жоғары жылдамдық пен командалық үйлесімділікті көрсетіп, күміс медальға ие болды. Ал 4-курс студенті, халықаралық дәрежедегі спорт шебері Никита Изотов 1500 метр қашықтықта үшінші орын алып, «қола» жүлде жеңіп алды.

Спорттық бәсеке екінші күні де жалғасын тауып, Kozybayev University студенттері тағы да жүлделі орындарға көтерілді.

Кирилл Субботин 800 метр қашықтықта чемпион атанып, мінез бен мықты физикалық дайындықтың үлгісін көрсетті. Ал Арина Мозгунова 100 метрге кедергілер арқылы жүгіруде жеке және командалық есепте тағы бір «қола» медаль иеленді.