Петропавлдық құтқарушылар балкон арқылы пәтерге кіріп, зейнеткер әйелге көмек көрсетті
9 маусым кешкісін Петропавл қаласының құтқарушылары Васильев көшесіндегі пәтерінде өздігінен қозғала алмай қалған егде жастағы әйелге жедел көмек көрсетті, деп хабарлайды QZ News.
69 жастағы туысына хабарласа алмаған алаңдаған жиені құтқару қызметіне жүгінген. Оқиға орнына жеткен жедел-құтқару жасағының қызметкерлері альпинистік құрал-жабдықтарды қолданып, төртінші қабаттың балконынан үшінші қабатқа түсіп, пәтерге кірген.
Ішке енген құтқарушылар жерде жатқан әлсіреген әйелді тауып алды. Ол өзін жайсыз сезінуіне байланысты тұра алмай қалған. Құтқарушылар зардап шеккен азаматшаны жедел жәрдем қызметкерлеріне тапсырып, ол ауруханаға жеткізілді.