Солтүстік Қазақстан облысында қыркүйек айы жаңбырлы болады деп болжануда

Қыркүйек айы Солтүстік Қазақстан облысында жаңбыр, екпінді жел және ауа температурасының айтарлықтай төмендеуімен күздің жақындағанын сездіреді. «Қазгидромет» РМК мәліметінше, 14-18 қыркүйек аралығында өңірде ауа райы құбылмалы болады. Алайда апта соңына қарай күндізгі ауа температурасы қайта көтеріледі, деп хабарлайды QZ NEWS тілшісі.

14 қыркүйек жауын-шашынды күндердің бірі болады. Облыс аумағында жаңбыр жауып, найзағай ойнайды. Солтүстікте қатты жаңбыр жаууы мүмкін. Түнде және таңертең батыс пен солтүстік аудандарда тұман түседі. Оңтүстік-батыстан соғатын желдің жылдамдығы секундына 9-14 метрге жетеді. Кей жерлерде екпіні 23-28 м/с-қа дейін күшейеді. Түнде ауа температурасы +7…+12°C, күндіз +13…+18°C болады.

15 қыркүйекте облыстың солтүстігі мен шығысында жаңбыр жауып, найзағай ойнайды. Таңертең қайтадан тұман түсуі мүмкін. Жел оңтүстік-шығысқа ауысып, секундына 9-14 метр жылдамдықпен соғады. Түнде ауа температурасы +5…+10°C-қа дейін төмендейді. Ал күндіз +15…+20°C-қа дейін жылынады.

16 қыркүйекте солтүстік пен шығыста жаңбырлы ауа райы сақталады. Түнде және таңертең батыс пен солтүстік аудандарда тұман түсуі ықтимал. Түнде ауа температурасы +3…+8°C болады. Күндіз күн біршама жылып, ауа температурасы +17…+22°C-қа жетеді.

17 қыркүйекте жауын-шашын негізінен түнде облыстың солтүстігі мен шығысында күтіледі. Таңертең кей жерлерде қайтадан тұман түседі. Оңтүстік-шығыстан соғатын желдің жылдамдығы секундына 9-14 метр болады. Түнде ауа температурасы +3…+8°C шамасында сақталса, күндіз +20…+25°C-қа дейін көтеріледі.

18 қыркүйекте жаңбыр мен найзағай облыстың батысы, солтүстігі және оңтүстік аудандарында болады. Бұл өңірлерде жел секундына 15-20 метрге дейін күшеюі мүмкін. Түнде ауа температурасы +3…+8°C болады. Ал күндіз ауа райы біршама жайлы болып, температура +20…+25°C шамасында сақталады.