«Солтүстік» ӘКК «Агробизнес – мал шаруашылығы» бағдарламасы бойынша алғашқы жеңілдетілген несие берді

«Солтүстік» ӘКК» АҚ. «Агробизнес – мал шаруашылығы» бағдарламасы аясында алғашқы жеңілдетілген несиені берді. Қаражат сүтті мал шаруашылығын дамытуға және асыл тұқымды мал басын жаңартуға бағытталды, деп хабарлайды QZ NEWS тілшісі.

Қаржыландыруды «Қызылжар Сүт» ЖШС алды. Кәсіпорын 5 жыл мерзімге жылдық 6 пайыздық мөлшерлемемен 339,4 млн теңге көлемінде несие тартты. Несие «Игілік» бағыты бойынша беріліп, сүтті бағыттағы голштин-фриз тұқымды асыл тұқымды мал сатып алуға жұмсалады.

Бөлінген қаражатқа шаруашылық 165 құнажын сатып алуды жоспарлап отыр. Малдарды іріктеуді кәсіпорын өкілдері Германияда жүргізеді. Сапар қыркүйек айына жоспарланған.

Жоғары өнімді мал басын сатып алу кәсіпорынның өндірістік базасын нығайтып, сүт өндірісінің тиімділігін арттыруға мүмкіндік береді деп күтілуде.

Жеңілдетілген несие беру бағдарламасы 2026–2030 жылдарға арналған Мал шаруашылығын дамытудың кешенді жоспарының бір бөлігі болды. Шілде айында «Солтүстік» ӘКК» АҚ мен «Аграрлық несие корпорациясы» АҚ «Игілік» және «Береке» бағыттары бойынша кредиттік желі ашу туралы келісім жасасты. Өңірге импорттық асыл тұқымды мал басын сатып алуға 15 млрд теңге қарастырылған.

Тамыз айында жеңілдетілген несие беру бағдарламаларын іске асыру жөніндегі комиссия алғашқы жобаларды қарады. Отырыс қорытындысы бойынша бес бастама мақұлданды. Олардың қатарында «Қызылжар Сүт» ЖШС-нің жобасы да бар.

Кәсіпорын мал шаруашылығы бағытын 2018 жылдан бері дамытып келеді. Екі жылдан кейін мұнда заманауи цифрлық сүт-тауарлы кешен іске қосылды. Өнімділік деңгейі бойынша компания Қазақстандағы үздік он сүт өндіруші кәсіпорынның қатарына енді.

Алғашқы несиенің берілуі өңірде жаңа кредиттік желіні іс жүзінде іске асыруға жол ашып, жергілікті шаруашылықтардың асыл тұқымды мал базасын жаңартуға қосымша мүмкіндік береді.