Полигонның жабылғанына 35 жыл: СҚО жастарына ядролық сынақтардың зардаптары туралы айтылды

29 тамызда Семей ядролық сынақ полигонының жабылғанына 35 жыл толады. Осыған орай С. Мұқанов атындағы облыстық кітапханада тақырыптық дөңгелек үстел өтті. Кездесуде өткеннен тағылым алу, болашақ туралы мәселелер талқыланды, деп жазады QZ News тілшісі.

Кездесуге «Семей полигоны СҚО» қоғамдық бірлестігінің өкілдері мен жастар қатысты. Іс-шараны өңірдің Жастар ресурстық орталығы ұйымдастырды. Орталық басшысы Анастасия Волкованың айтуынша, басты мақсат – жастарға өткеннен алынған сабақтарды жеткізу.

«Қазақстан бейбітшілік, қауіпсіздік және ядролық қарудан бас тарту жолын таңдап, тарихи шешім қабылдады. Біздің міндетіміз – осы тарихи жадыны жас ұрпаққа жеткізу, өткеніміз туралы ашық айту және болашағымызды қандай түрде көргіміз келетіні туралы бірге ойлану», – деді ол.

2016 жылдан бері СҚО-да «Семей полигоны» қоғамдық бірлестігі жұмыс істейді. Бірлестік төрағасы Қайролла Қамзиновтың айтуынша, бүгінде сол бір қасіретті кезеңнің ардагерлеріне көмек көрсетіліп келеді. Барлық мерекелер мен атаулы даталарды олар бірлестік базасында бірге атап өтеді.

«Біз ардагерлерді облыстық мәслихат ғимаратында, бірлестігіміз орналасқан жерде қабылдаймыз. Оларға көмектесеміз, кейде үйлеріне де барып тұрамыз», – деді спикер.

Полигонның 40 жылдық жұмысы барысында шамамен 468 ядролық сынақ жүргізілген. Оның зардабын 1,5 миллионнан астам қазақстандық тартты.