Петропавлда жаңа театр маусымдары ресми түрде ашылды

Петропавлда жаңа театр маусымы бірден бірнеше сахнада басталды. Н.Погодин атындағы Солтүстік Қазақстан облыстық орыс драма театры үшін бұл – 140-шы маусым. Ал С.Мұқанов атындағы қазақ сазды-драма театры 28-ші маусымын ашып, көрермендерге арнайы мерекелік бағдарлама ұсынды, деп хабарлайды QZ NEWS тілшісі.

Погодин театрының мерейтойлық күні бірнеше буын өкілін біріктірді. Бағдарлама балаларға арналған шарадан басталды. Жас көрермендер үшін әртістер ойындар, викториналар, импровизациялар және спектакль кейіпкерлерімен танысуға мүмкіндік беретін интерактивті кездесу ұйымдастырды. Одан кейін театр тарихы мен оның кәсіби ұжымына арналған шаралар жалғасты.

Баспасөз мәслихаты мен дөңгелек үстелде театр сыншылары, мәдениет саласының өкілдері, әртістер, режиссерлер және бұқаралық ақпарат құралдарының өкілдері бас қосты. Кездесуде театрдың 140 жылдық тарихы, сахналанған қойылымдары және әр жылдары оның шығармашылық келбетін қалыптастырған тұлғалар туралы сөз болды. Сонымен қатар театрдың болашағы, қазіргі көрерменнің қызығушылығын сақтап қалу үшін сахна қандай болуы керектігі талқыланды.

Мерейтойлық маусымның салтанатты ашылуы күннің басты оқиғасына айналды. Қонақтарды қызыл кілем үстінде қарсы алып, театр-музыкалық пролог ұсынылды. Сондай-ақ бұл күні сахна ардагерлері мен театр қызметкерлеріне құрмет көрсетілді.

С.Мұқанов атындағы қазақ сазды-драма театрында да мерекелік көңіл күй орнады. Мұнда 28-ші маусым «Театр өмірі – сахна сыры» атты бағдарламамен ашылды. Мерекелік шараға Астана қаласындағы Қ.Қуанышбаев атындағы Қазақ ұлттық музыкалық драма театрының өкілдері арнайы келді.

Театрдың көркемдік жетекшісі Дәурен Тойбазаров мұндай кездесулердің шығармашылық тәжірибе алмасу үшін маңызы зор екенін атап өтті.

«Жас труппа үшін сахнаның танымал шеберлерінен тәжірибе үйреніп, басқа қалалардағы әріптестермен шығармашылық байланысты нығайтуға бұл – тамаша мүмкіндік», – деді ол.

Әртістер Уильям Шекспирдің «Ромео мен Джульетта» трагедиясы желісі бойынша шағын спектакль-этюд ұсынды. Жас өнерпаздар үшін мұндай қойылымдар өз шеберлігін көрсетуге ғана емес, жаңа сахналық формаларды сынап көруге де мүмкіндік береді.

С.Мұқанов атындағы театрда бүгінде 50-ге жуық актер қызмет етеді. Театр репертуарында 200-ден астам қойылым бар. Жаңа маусымда көрермендерді бірнеше премьера күтіп тұр. Алайда жаңа қойылымдардың нақты мазмұны әзірге құпия болып отыр.