Петропавлда автобуста әйелге тиісіп, әдепсіз әрекет жасаған шетелдік Қазақстаннан шығарылады
November 2, 2026 10:52
Қырғызстанның 34 жастағы азаматының ұсақ бұзақылық жасағаны туралы жарияланым Петропавлдағы әлеуметтік желілердегі пабликтердің оқырмандарының назарын аударды. Бұл туралы QZ NEWS хабарлайды.
№4А бағытындағы автобуста шетелдік 41 жастағы әйелге тиісіп, оның белінен төмен тұсын сипаған. Сот оған 15 тәулікке әкімшілік қамаққа алу жазасын тағайындады.
«Алайда әдепсіз әрекеті үшін жауапкершілік мұнымен аяқталған жоқ. Көші-қон қызметінің қызметкерлері аталған азаматты Қазақстан Республикасының аумағынан шығару туралы өтінішхатпен Петропавл қаласының №2 сотына жүгінді. Сот істің мән-жайын қарап, өтінішхатты қанағаттандырды. Алдағы бес жылда оған Қазақстанға кіруге тыйым салынады», – делінген СҚО Полиция департаментінің хабарламасында.