Гүлбахша Мұсабаева: «Заңды білу жауапкершілікпен ұштасуы тиіс»
Адамның заңды қаншалықты білетіні, өз құқықтарын түсінуі және жеке жауапкершілігін сезінуі көбіне алған біліміне байланысты. Сондықтан заңнаманы біліп қана қоймай, оны өмірде қолдана алатын мамандарды даярлау құқықтық мемлекетті дамытудың маңызды бөлігіне айналып отыр. Бұл міндет елдің жаңа Ата заңында да көрініс тапқан. Бұл туралы QZ NEWS тілшісі хабарлайды.
Халықтық Конституцияның 3-бабында мемлекеттік саясаттың стратегиялық бағыттарының қатарында адами капиталды, ғылымды, білім мен инновацияны дамытуға ерекше орын берілген. Бұл ұғымдардың астарында тек жаңа технологиялар мен ғылыми жетістіктер ғана емес, ең алдымен адамдар, олардың білімі, кәсіби дағдылары және жауапты шешім қабылдай білу қабілеті жатыр.
Kozybayev University-де бұл басымдықтар біртіндеп теориядан тәжірибеге ұласуда. Атап айтқанда, заң мамандығында білім алып жүрген студенттер құқық қорғау жүйесінің жұмысымен жақынырақ танысуға мүмкіндік алды. Университет прокуратура, ішкі істер органдары және экономикалық тергеп-тексеру департаментімен өзара байланысты дамытып келеді. Мұндай ынтымақтастық болашақ заңгерлерге мамандықтың қыр-сырын ішінен танып, заңнаманы қолдану ерекшеліктерін түсінуге және академиялық білімдерін нақты міндеттермен ұштастыруға мүмкіндік береді.
Білім беру ортасы да өзгеріп келеді. Мамандарды даярлау үшін жаңа оқу кабинеттері жабдықталып, университеттің тәжірибелік бөлімшелермен байланысы нығаюда. Нәтижесінде оқу үдерісі тәжірибеге бағытталып, студенттерге әлі білім алып жүрген кезінен-ақ болашақ мамандығының ерекшеліктерін тереңірек түсінуге жол ашылады.
Заң ғылымдарының кандидаты Гүлбахша Мұсабаеваның пікірінше, заңгерлік білімнің сапасын тек меңгерілген заңдар мен нормативтік құжаттардың көлемімен өлшеуге болмайды. Жастардың бойында әділдік пен жауапкершілікті терең түсіну қасиетін қалыптастыру да маңызды.
«Заңнаманың барлық баптарын жетік білуге болады. Алайда заңгер мамандығы үшін бұл жеткіліксіз. Заңның нақты өмірлік жағдайда қалай қолданылатынын түсіну, адамның сөзін тыңдай білу, мән-жайды жан-жақты зерделеу және салмақты шешім қабылдау маңызды. Нағыз маманды өзгелерден ерекшелендіретін де – осындай қасиеттер. Сондықтан студенттердің оқу кезінде-ақ нақты кәсіби ортамен танысуына жағдай жасауға тырысамыз», – дейді ол.
Оқытушының пікірінше, құқықтық мәдениет өздігінен қалыптаспайды және мемлекеттік органдардың жұмысымен ғана шектелмейді. Ол адамдардың күнделікті іс-әрекетінен, өз міндеттеріне деген көзқарасынан және айналасындағылардың құқықтарын құрметтеуінен көрініс табады. Мұнда адамның жастайынан қандай құндылықтар мен білім алғаны үлкен рөл атқарады.