Полиция қызметкерлері жол қызметтерінің дайындығын пысықтады
Қыс мезгілінде Солтүстік Қазақстан облысының жолдарында қауіп бірнеше минуттың ішінде туындауы мүмкін. Қарлы боран, қарлы үйінділер, көктайғақ пен нашар көріну жағдайы жүргізушілер үшін үйреншікті бағыттың өзін сынаққа айналдырады. Қолайсыз ауа райында жол-көлік оқиғаларының алдын алу және қозғалысқа қатысушыларға жедел көмек көрсету мәселелері СҚО Полиция департаментінде өткен кеңесте талқыланды. Бұл туралы QZ NEWS тілшісі хабарлайды.
2025–2026 жылдардағы қысқы маусымда өңірде 109 жол-көлік оқиғасы тіркелген. Салдарынан 10 адам қаза тауып, тағы 153 адам жарақат алған. Статистика қысқы маусымға дайындық тек қарды уақтылы тазалау мәселесі емес, ең алдымен адамдардың қауіпсіздігіне қатысты екенін көрсетеді.
Қыс мезгілі қарсаңында полиция қызметкерлері бірқатар мемлекеттік орган мен жолдарды күтіп-ұстауға жауапты ұйым өкілдерін ортақ кеңеске жинады. Жиында арнайы техниканың дайындығы, көктайғаққа қарсы және жолға себілетін материалдардың қоры, жылыту пункттерінің жұмысы, сондай-ақ қолайсыз ауа райы кезінде қызметтердің өзара іс-қимылы сөз болды.
Атқарылатын жұмыс ауқымды. Солтүстік Қазақстан облысындағы автомобиль жолдары мен көше-жол желісінің жалпы ұзындығы 16 мың шақырымға жуықтайды. Жыл басынан бері полиция қызметкерлері жол инфрақұрылымына екі мыңнан астам тексеру жүргізіп, анықталған кемшіліктерді жою туралы 1627 нұсқама берген.
Әсіресе жыл сайын қар құрсауы пайда болып, көктайғақ пен көріну деңгейінің төмендеуі байқалатын жол учаскелері ерекше алаңдаушылық туғызады. Сонымен қатар жол-көлік оқиғалары жиі болатын аумақтарды да тұрақты бақылауда ұстау маңызды.
Дегенмен кейбір мәселелерді бір ғана кеңес өткізу арқылы шешу мүмкін емес. Атап айтқанда, жергілікті маңызы бар жолдардағы жағдай күрделі күйінде қалып отыр.
«Күрделі мәселелердің бірі – мамандандырылған жол техникасының жеткіліксіздігі және мердігер ұйымдардың болмауы. Кейбір жағдайларда жұмыстарды жақын маңдағы шаруа қожалықтары атқарады», – деді СҚО Полиция департаменті Әкімшілік полиция басқармасының бастығы Алтынбек Жамалиев.
Кездесуде халықты хабардар ету мәселесіне де жеке тоқталды. Ауа райы күрт нашарлаған жағдайда автожолдардың жабылуы мен қозғалысқа қойылған шектеулер туралы ақпарат жүргізушілерге дер кезінде жетуі тиіс. Мұнда хабарламаларды жедел тарату ғана емес, жол қызметтерінен бастап полиция мен құтқарушыларға дейінгі барлық қызметтің үйлесімді әрекеті маңызды.
СҚО Полиция департаменті Әкімшілік полиция басқармасы бастығының орынбасары Ержан Тамышевтің айтуынша, кеңес 11 қарашада Ішкі істер министрінің тапсырмасымен өткізілген. Жиынның басты мақсаты – алдағы қысқы кезеңде жауапты қызметтердің төтенше жағдайларға жедел әрекет етуге дайындығын бағалау.
Полиция өкілдері бұл жұмыстың тиімділігін тексерулер мен берілген нұсқамалардың санымен бағалауға болмайтынын атап өтті. Ең басты нәтиже – ауа райы күрделі болған күннің өзінде қайғылы оқиғаларға жол бермей, адамдардың өмірі мен денсаулығын сақтау. «Заң және тәртіп» тұжырымдамасы аясындағы бірлескен жұмыстың негізгі мақсаты да осы болмақ.