«Ботай» арт-галереясында суретші Нұрбек Жәрдемовтің ауқымды көрмесі ашылды
Петропавлдағы «Ботай» арт-галереясында Орал қаласынан келген суретші Нұрбек Жәрдемовтің «Ақжайық өлкем» атты жеке көрмесі ашылды. Экспозиция автордың 55 жылдық мерейтойына орай ұйымдастырылған. Галереяға қылқалам өнерін бағалайтын қауым мен шығармашылық зиялы қауым өкілдері жиналып, тарих, табиғат және философиялық толғаныстар тоғысқан туындылармен танысты. Мұнда суретші қоршаған ортаны өзіндік көркемдік көзқараспен бейнелеген, деп хабарлайды QZ NEWS тілшісі.
Көрме Нұрбек Жәрдемовтің шығармашылық әлеміне жасалған өзіндік саяхат іспетті. Мұнда суретші көрген дүниесін кенепке сол күйінде түсірумен шектелмейді. Ол көрерменге қоршаған ортаға деген жеке көзқарасын ұсынады. Таныс бейнелер жаңа сипатқа ие болып, абстрактілі пішіндердің астарында адам, уақыт және ұлттық тамыр туралы терең ойлар жатыр.
Экспозиция төрт тақырыптық бөлімге бөлінген. Олар – «Тарих», «Табиғат», «Тұрмыстық қарым-қатынас» және «Өмір философиясы». Алғашқы бөлімге тарихи тұлғаларға арналған туындылар топтастырылса, екіншісінде табиғат көріністері бейнеленген. Адамдар арасындағы қарым-қатынас пен күнделікті тіршілікке арналған жұмыстарға да жеке орын берілген. Ең ауқымдысы – біртұтас стильдік композицияға біріктірілген 36 туындыдан тұратын философиялық бөлім.
Бұл картиналарда көрермен нақты сюжетті іздеуден гөрі, әрбір бөлшекке үңіліп, бейнелерді салыстырып, туындаған сауалдарға өзінше жауап табуға тырысады. Автор символизм мен мәнерлі көркемдік шешімдерді пайдалана отырып, дала философиясына, тарихи жадыға және қазақтың дүниетанымына назар аударады. Оның туындылары әр адамға өзінше ой түюге мүмкіндік береді. Бір ғана бейне әртүрлі ассоциация тудыруы мүмкін.
Нұрбек Жәрдемов шығармашылығында ұлттық болмыс тақырыбы ерекше орын алады. Дегенмен суретші дәстүрлі нақыштарды сол қалпында бейнелеумен шектелмейді. Керісінше, қалыптасқан түсініктерді жеке элементтерге бөліп, оларды өзінің көркемдік пайымы арқылы жаңаша құрастырады.
«Мен үшін эксперимент жасау ешқашан жат болған емес. Меніңше, суретші өмір бойы ізденіп, үйренуі керек. Сондықтан үнемі жаңа дүниелерді байқап, тың пішіндер мен бейнелеу тәсілдерін іздеймін. Кейде маған: «Өз стиліңде жаза бер, сенің қалыптасқан қолтаңбаң бар» деп жатады. Біраз уақыт сол бағытта жұмыс істегеніммен, кейін бәрібір эксперимент жасауға кірісемін. Басқаша істей алмаймын. Іздену, өзгеру, жаңа дүниелерді ашу маған қызық. Елуден ассам да, ең маңызды жұмыстарымның бәрі жасалып қойды деп ойламаймын. Алда әлі талай дүние бар деп сенемін», – дейді Нұрбек Жәрдемов.
Мерейтой иесінің шығармашылық жолында жеткен жетістіктері аз емес. Нұрбек Жәрдемов Қазақстан Суретшілер одағының, Еуразиялық дизайнерлер одағының және «Тұран» халықаралық суретшілер бірлестігінің мүшесі. Оның туындылары мен шығармашылық еңбегі халықаралық деңгейде танылған. Суретші «Тұран» халықаралық сыйлығының лауреаты атанып, Солтүстік Кипр Түрік Республикасының «Күміс кілт» құрметті наградасымен және «Еңбек даңқы» медалімен марапатталған.
Суретшінің өзі үшін жеке көрме шығармашылығының әр кезеңіндегі туындыларын бір кеңістікте ұсынуға мүмкіндік берді. Ал келушілер үшін бұл – шебердің көркемдік қолтаңбасы қалай қалыптасқанын, жылдар бойы қандай тақырыптарға басымдық бергенін тануға берілген мүмкіндік.