Тайынша ауданында мұғалімдердің еңбек демалысы заңсыз қысқартылған
October 4, 2023 10:24
СҚО прокурорлары еңбек қатынастары саласында талдау жүргізу кезінде қызметкерлердің құқықтарына нұқсан келтіру фактілерін анықтады, деп хабарлайды QZ Media тілшісі.
“Тайынша ауданының білім бөлімінің лауазымды адамдары 2021 жылғы 1 ақпандағы ҚР Білім және ғылым вице–министрі бекіткен Еңбек кодексінің және әлеуметтік әріптестік туралы келісімнің талаптарын бұза отырып, білім беру саласындағы қызметкерлерге 33 емес, 30 күн көлемінде ақылы еңбек демалысын берді”, – деп жазылды облыстық прокуратураның хабарламасында.
Ауданның білім бөлімінің лауазымды тұлғасы тәртіптік жауапкершілікке тартылды. 94 қызметкерге қосымша 3 күн көлемінде демалыс көбейтілді, сондай-ақ 945 мың теңге көлемінде ақшалай қаражат есептелді.