М.Жұмабаев ауданында сағатына 100 тонна өнім шығаратын асфальт-бетон зауытын салу жоспарлануда
Биыл М.Жұмабаев ауданында жалпы сомасы 2,7 млрд теңгеге 45 шақырым аудандық және ауылішілік жол жөнделді. Бұл туралы брифинг барысында Рахат Смағұлов айтты, деп хабарлайды QZ News тілшісі.
«Биылғы жылы республикалық маңызы бар «Сулышок-Возвышенка», «Чистое – пост Қарақоға» жол учаскелері, облыстық маңызы бар «Қарақоға-Надежка» жолының жалпы ұзындығы 56 шақырымдық учаскесі 4 млрд теңгеден астам қаржығы жөнделді. Биылғыжылы Лебяжі, Ноғайбай, Сулышок ауылдарының кіреберістері, Возвышенка, Надежка, Полтавка, Бәйтерек, Жастар ауылдарының ауылішілік көшелері жөнделді, Булаево қаласындағы Чехов көшесінде, Ұзынкөл-Возвышенка, Лебяжі-Құралай автожолдарының учаскелерінде жөндеу жұмыстары жүргізілуде», – деді М.Жұмабаев ауданының әкімі.
Ауданда республикалық маңызы бар автомобиль жолдарын қыста күтіп ұстау үшін «Қазжсервис» АҚ-ның 2 техникалық қызмет көрсету пункті жұмыс істейді. Облыстық және аудандық маңызы бар жолдарда күтіп ұстау жұмыстарын «Петропавл жолдары» ЖШС жүргізеді. Өңірдегі ауылшаруашылық ұйымдары қыста жолдарды күтіп ұстауға көмектеседі. Қалған көшелер мен тас жолдарда 50 бірлік мамандандырылған техника,көктайғаққа қажетті материал дайындалған.
2025 жылға дейін «Возвышенка-Молодогвардейское» республикалық маңызы бар жол учаскесін жөндеу жоспары бар. Техникалық құжаттама дайындалуда, «Қарақоға-Надежка» аудандық жолдарын жөндеуді және «Булаево-Советское» ағымдағы жөндеуді аяқтау жоспарлануда. Александровка, Пролетарка, Чистовское, Ұзынкөл, Полудино ауылдарына баратын 5 кірме жолды жөндеуге техникалық құжаттама дайындалды. «Таманское – Пулемётовка», «Қарағанды – Надежка» бағыттары бойынша жол учаскелерін жөндеу жоспарлануда. Возвышенка, Қарақоға, Советское, Надежка, Бәйтерек, Бастомар, Лебяжі, Ұзынкөл және Молодогвардейское ауылдарының ауылішілік жолдарын жөндеуге техникалық құжаттамалары бар. Қаржы бөлінсе, келесі жылы бұл жобалар жүзеге асады», — деді Рахат Смағұлов.
Аудан орталығы мен Медвежка ауылындағы 8 көшені жөндеуге жобалық-сметалық құжаттама дайындалды. Осы жобалардың барлығын сәтті жүзеге асыру үшін қуаттылығы сағатына 100 тонна асфальт-бетон зауытын салу мәселесі қарастырылуда, деп қосты Рахат Смағұлов.