Тамыз айында СҚО-да Халықаралық суретшілер симпозиумы мен «Qyzyljar Music Fest» өтеді

Солтүстік Қазақстан облысы өзінің бай мәдени мұрасы мен заманауи технологияларын ұштастыра отырып, туристік әлеуетін белсенді түрде дамытып келеді. Биыл тамыз айында өңірде ауқымды ІІІ Халықаралық суретшілер симпозиумы — «Ботай – Ұлы Даланың мәдениеті» өткізу жоспарлануда, деп хабарлайды QZ News.

СҚО әкімдігі отырысында облыстық мәдениет, тілдерді дамыту және архив ісі басқармасы басшысының орынбасары Мафруза Науанованың айтуынша, бұл іс-шараның мақсаты — бірегей археологиялық ескерткіш «Ботайды» кеңінен насихаттау.

«Симпозиумға Түркі мемлекеттері ұйымына мүше елдерден — Түркия, Қырғызстан, Өзбекстан, Әзербайжан, Қазақстан, сондай-ақ Саха Республикасы (Якутия), Татарстан, Башқұртстан, Венгрия, Түрікменстан және Моңғолиядан 20 кәсіби суретші жиналады. Тағы бір маңызды оқиға — «Мағжан орталығының» ашылуы болмақ. Бұл орталықтың жұмысы қазақ әдебиетінің көрнекті өкілі Мағжан Жұмабаевтың бай шығармашылығын насихаттауға бағытталып, жаңа шығармашылық жобаларды жүзеге асыруға мүмкіндік береді», – деді Мафруза Науанова.

Сонымен қатар Петропавл қаласында дәстүрлі «Qyzyljar Music Fest» халықаралық музыкалық фестивалі де өтетін болады.