Ғауез Нұрмұхамбетов: «СҚО-ның туристік мүмкіндіктерін насихаттауымыз қажет»

Солтүстік Қазақстан облысының әкімі Ғауез Нұрмұхамбетов өңірдегі туризм саласын дамыту үшін жүйелі тәсіл мен барлық коммуникациялық арналар арқылы белсенді ақпараттық жұмыс жүргізуді тапсырды, деп хабарлайды QZ News.

СҚО аумағында Ботай қонысы – жылқыны алғаш қолға үйреткен орын, Айыртау ауданындағы Айғаным қонысы, Қызылжар ауданындағы Ақ-Ирий қалашығы және Уәлиханов ауданындағы Алтын Орда дәуіріне жататын Қызыл-Оба ескерткіші сияқты тарихи маңызы зор нысандар орналасқан.

«Бұл жерлердің туристік әлеуеті зор, дегенмен олар әлі күнге дейін қазақстандықтардың кең ауқымына таныс емес. Біздің мақсатымыз – өңірдің туристік мүмкіндіктерін кеңінен насихаттап, СҚО-ны саяхаттауға қолайлы бағыт ретінде қалыптастыру. Ол үшін жүйелі жұмыс пен барлық байланыс арналарын қамтитын ақпараттық науқан қажет», – деп жазды өңір басшысы әлеуметтік желідегі парақшасында.

Сондай-ақ өңірде Петропавл қаласындағы Қазақстан Конституциясы көшесіне ресми мәртебе беріп, оны әлемдегі ең ұзын жаяу жүргіншілер көшесі ретінде тануға тырысып жатыр.

«Бұл атақты ресми түрде тіркеу жұмыстары жүріп жатыр. Бұл локацияны қаланың туристік брендіне және тарих, мәдениет пен заманауи өмірдің тоғысқан нышанына айналдырады», – деп толықтырды СҚО әкімі.