Ғабит Мүсірепов ауданындағы сүт фермасы Еуропадан әкелінген 330 голштинмен толықты
Германиядан асыл тұқымды ірі қараның ірі партиясы Ғабит Мүсірепов ауданындағы «Буденное-СК» ЖШС-нің сүт-тауарлы фермасындағы мал басын толықтырды. Мал сатып алу «Агробизнес – мал шаруашылығы» бағдарламасы аясындағы жеңілдетілген несие арқылы жүзеге асқан, деп хабарлайды QZ NEWS тілшісі.
Шаруашылық өткен жылы 1200 басқа арналған заманауи ферманы іске қосты. Мұнда мал табынын автоматтандырылған басқару, өндірістік процестерді цифрлық бақылау, жануарлардың денсаулығы мен сүт сапасын мониторингтеу жүйелері енгізілген. Кәсіпорынды жабдықтау үшін құны шамамен 1 миллиард теңге болатын танымал Westfalia брендінің құрал-жабдықтары орнатылды.
Сүт-тауарлы ферманың құрылысы «Солтүстік» ӘКК» АҚ қолдауымен, ауыл шаруашылығы кәсіпорындарын жеңілдетілген несиелендіру бойынша Солтүстік Қазақстан облысының тәжірибесін кеңейтуге бағытталған ірі жоба аясында жүргізілді.
Биыл «Буденное-СК» ЖШС «Агробизнес – мал шаруашылығы» бағдарламасының «Игілік» бағыты бойынша 700 миллион теңге көлемінде несие алды. Қаражат голштин тұқымды 330 бас асыл тұқымды мал сатып алуға бағытталды. Жануарлар Германиядан екі партиямен жеткізілді.
«Бағдарлама ауыл шаруашылығы тауарын өндірушілерге жоғары өнімді асыл тұқымды мал сатып алып, өндірістік қуатын кезең-кезеңімен арттыруға мүмкіндік береді. Бұл жекелеген шаруашылықтарды дамытуға ғана емес, еліміздің азық-түлік қауіпсіздігін нығайтуға да қосылған үлес», – деп атап өтті «Солтүстік» ӘКК» АҚ өкілдері.
Жаңа мал басы әкелінгеннен кейін фермадағы сауынды сиыр саны 984 басқа жетті. Кәсіпорын жобалық қуатына шыққан кезде жылына 10 мың тоннаға дейін сүт өндіре алады.
Еске сала кетейік, шілде айында «Солтүстік» ӘКК» АҚ мен «Аграрлық несие корпорациясы» АҚ «Агробизнес – мал шаруашылығы» бағдарламасы аясында кредиттік желі ашу туралы келісімге қол қойған болатын. Қаржыландыру «Игілік» және «Береке» бағыттары бойынша қарастырылған. Сонымен қатар «Даму» қорының несие сомасының 85 пайызына дейінгі мөлшерде кепілдігін тарту мүмкіндігі бар.
Өңірге импорттық асыл тұқымды мал сатып алуға 15 миллиард теңге бөлінді. Қазақстанның 2026–2030 жылдарға арналған мал шаруашылығын дамыту жөніндегі кешенді жоспары аясында қабылданған бұл бағдарлама асыл тұқымды мал қорын жаңартуға және азық-түлік қауіпсіздігін қамтамасыз ету міндеттерін шешуге бағытталған.