«Қызылжар» — «Қайрат»: Петропавлда өткен тартысты матч 0:1 есебімен аяқталды
«Қарасай» стадионында Қазақстан Премьер-лигасының 2025 жылғы маусымындағы соңғы матчы өтті. Онда жергілікті «Қызылжар» футбол клубы алматылық «Қайратты» қабылдады. Тартысты өткен ойында қонақтар жеңіске жетіп, турнир кестесінің көшбасына шықты, деп хабарлайды QZ News тілшісі.
Бұл матч петропавлдық жанкүйерлердің үлкен қызығушылығын тудырды. Көпшілік өз командасын қолдау үшін келгенімен, трибуналарда футболға ортақ сүйіспеншілігі біріктірген алматылық клубтың жанкүйерлері де болды.
Ойын тағдырын алғашқы таймда соғылған жалғыз гол шешті. Дастан Сәтпаев алаң иелерінің қақпасын дәл көздеп, есеп ашты. Осылайша 0:1 есебі алматылықтардың пайдасына матч соңына дейін өзгеріссіз қалды.
Айта кетейік, қыркүйек айының соңында Алматыда Чемпиондар лигасы аясында өткен ойында еліміздің намысын алматылық «Қайрат» қорғаған болатын. Қазіргі таңда команда ел біріншілігінде көш бастап тұр және қазақстандық спортты халықаралық аренада танытып келеді. «Қызылжармен» өткен кездесуден кейін клуб «Астананы» басып озып, КПЛ-2025 рейтингінде бірінші орынға шықты.
