Петропавлда жүлде қоры 1 миллион теңгені құрайтын Counter-Strike турнирі басталды
Петропавлда Counter-Strike бойынша екі күндік турнир басталды. Оған Солтүстік Қазақстан облысы мен еліміздің өзге өңірлерінен 17 команда қатысып отыр. Байқау облыс әкімдігінің ішкі саясат басқармасының қолдауымен қазан және қараша айларында өтетін киберспорттық іс-шаралар сериясының алғашқы кезеңі болды, деп хабарлайды QZ NEWS тілшісі.
Жобаны «СҚО Жастар мәслихаты» қоғамдық бірлестігі өңірлік киберспорт федерациясымен бірлесіп ұйымдастырып отыр. Бастаманың негізгі мақсаты – жастар арасында киберспортты дамытуға жағдай жасау, талантты ойыншыларды анықтау және облыстық құрама команда жасақтау.
Киберспорт федерациясының өкілі Абай Әлжановтың айтуынша, өңірде компьютерлік ойындарға спорттық пән ретінде қызығушылық артып келеді. Бұл турнир алдағы екі айда өткізілетін төрт ірі жарыстың алғашқысы.
«Киберспорт бүкіл ел бойынша қарқынды дамып келеді. Ірі қалаларда ауқымды турнирлер өтуде, ал кейбір жарыстар халықаралық деңгейге де шығып жатыр. Біздің жастар да осы қозғалыстың бір бөлігі болуға ұмтылады. Жастар тарапынан үлкен қызығушылық бар екенін көріп отырмыз. Солтүстікқазақстандық киберспорттың болашағы зор деп есептейміз», – деді Абай Әлжанов.
Биылғы жарысқа әрқайсысы бес негізгі ойыншыдан құралған 17 команда қатысып отыр. Ұйымдастырушылар жаттықтырушылар мен қосалқы ойыншылардың да қатысуына мүмкіндік жасаған. Алғашқы кезеңде командалар топтарға бөлініп, келесі кезеңге жолдама үшін бақ сынауда. Екінші күні жеңілген команда жарыстан шығатын ойындар өтеді. Нәтижесінде турнир жеңімпаздары анықталады.
Counter-Strike турнирінің жүлде қоры – 1 миллион теңге. Бұдан бөлек, ұйымдастырушылар демеушілерді тартып, қатысушылар үшін қосымша ұтыс ойындарын ұйымдастырды. Жобаға AXE және «Союзмедиагрупп» компаниялары қолдау көрсетті. Сондай-ақ жарысқа киберспортты жастар арасында насихаттауға атсалысып жүрген блогерлер мен белсенділер де қосылды.
Турнир географиясы Петропавлмен ғана шектелмейді. Қатысушылар қатарында Астана мен Көкшетаудан келген командалар бар. Бұл жарысқа деген қызығушылықтың кеңейіп келе жатқанын көрсетеді. Сонымен қатар ұйымдастырушылар жергілікті ойыншыларға ерекше көңіл бөліп, алдағы уақытта Солтүстік Қазақстан облысының құрамасын жасақтауды көздеп отыр.
Алдағы айларда қатысушыларды басқа да танымал киберспорттық бағыттар бойынша жарыстар күтеді. Серия аясында Dota 2, FIFA және Mobile Legends ойындарынан турнирлер өткізу жоспарланған. Осылайша ұйымдастырушылар киберспорттың түрлі бағыттарын қамтып, мүмкіндігінше көп жасты жарыстарға тартуды мақсат етіп отыр.
Федерацияның жоспарына облыстық киберспорт лигасын құру да кіреді. Оған қалалық командалармен қатар ауылдық жерлерден келген командалар да қатыса алады. Бұл облыс аудандарындағы жастарға өздерін танытып, жарыс тәжірибесін жинақтауға және өңірлік құрама сапынан орын алуға мүмкіндік береді.
Абай Әлжановтың айтуынша, өңірде турнирлер өткізуге қажетті техникалық база қалыптасқан. Қажетті жабдықтар, ұйымдастыру техникасы мен ойын құрылғылары бар. Ендігі міндет – бір реттік жарыстарды біртіндеп Солтүстік Қазақстан облысының түкпір-түкпіріндегі киберспорт әуесқойларын біріктіретін тұрақты спорттық қозғалысқа айналдыру.