СҚО педагог-хореографы Михаил Лахтинге «Қазақстанның еңбек сіңірген ұстазы» құрметті атағы берілді

Ұстаздар күніне орай Ақордада білім беру саласындағы жоғары жетістіктері және Қазақстан Республикасына сіңірген еңбегі үшін бірқатар мұғалімге Мемлекет басшысы Қасым-Жомарт Тоқаевтың атынан жоғары мемлекеттік наградалар табысталды. Марапатталғандардың қатарында Петропавлдағы №8 эстетикалық тәрбие беру мектеп-кешенінің педагог-хореографы, Ақан сері атындағы облыстық филармонияның «Мәңгілік» би ансамблінің көркемдік жетекшісі Михаил Васильевич Лахтин де бар. Оған «Қазақстанның еңбек сіңірген ұстазы» құрметті атағы берілді, деп хабарлайды QZ NEWS тілшісі.

Бұл жоғары марапат – ұстаздың көп жылғы кәсіби еңбегіне, өнерге және педагогикалық қызметке деген адалдығына, шығармашылық шеберлігіне, сондай-ақ өскелең ұрпақты тәрбиелеуге қосқан елеулі үлесіне берілген лайықты баға.

Михаил Лахтиннің шығармашылық жолы сонау 1974 жылы «Теміржолшы» мәдениет үйінің ансамблінде басталды. 1977 жылы ол бүкіл Кеңес Одағына танымал «Арай» шығармашылық ұжымына ауысты. Ал 1983 жылы өзінің «Өзен» ансамблін құрды. Бұл ұжымда бүгінде өз би студиясын басқарып жүрген Алина Ушакова да өнер көрсетті. Қазіргі уақытта Михаил Лахтин «Мәңгілік» ансамблінің жетекшісі қызметін атқарады.

Ондаған жылдық еңбек жолында Михаил Лахтин талантты бишілердің бірнеше буынын тәрбиелеп шығарды. Белгілі балетмейстердің айтуынша, оның жұмысындағы басты мақсат – жай ғана би қойылымын дайындау емес, шәкірттерінің бойында мықты тұлға қалыптастыру.

Оның тәлімінен өткен көптеген шәкірт ұстазының талапшылдығы мен кәсіби қатаңдығын жақсы біледі. Алайда дәл осы талап пен тәртіп жас бишілердің сахна мәдениетін қалыптастырып, өнердегі өз жолын табуына ықпал етті.