Петропавлдық педагог Айгүл Қыдыбекова әр баланың шығармашылық әлеуетін ашуды өзінің басты мақсаты санайды

Ұстаздар күні – білім беріп қана қоймай, балалардың қабілетін ашуға, өзіне деген сенімін арттыруға және өмірден өз жолын табуға көмектесіп жүрген педагогтар туралы айтудың жақсы мүмкіндігі. Солардың қатарында қазақ тілі мен әдебиеті пәнінің мұғалімі Айгүл Амангелдіқызы Қыдыбекова да бар. Ол үшін шәкірттерінің жетістігі – кәсіби жолының маңызды бөлігі, деп хабарлайды QZ NEWS тілшісі.

Мұғалімнің еңбегі сабақпен және мектеп бағдарламасымен ғана шектелмейді. Бұл – әр баланы қызықтыра білу, шыдамдылық пен шығармашылықты талап ететін күнделікті еңбек. Әсіресе ана тілі мен әдебиеті сабақтарында оның маңызы зор. Себебі тіл мен әдебиеттегі ережелер мен шығармалардың астарында ұлттық мәдениеттің байлығы, тарихы мен халықтың рухани құндылықтары жатыр.

Айгүл Қыдыбекова оқу үдерісін мазмұнды әрі қызықты етуге ұмтылады. Ол оқушылардың шығармашылық бастамаларына қолдау көрсетіп, интеллектуалдық және әдеби байқауларда өз мүмкіндіктерін сынап көруге бағыт береді. Бұл еңбектің нәтижесі шәкірттерінің көптеген марапаттарынан көрінеді.

Мәселен, 2024 жылы оқушысы Мәлика Төлегенова «Ақбота» республикалық интеллектуалдық олимпиадасында III орын иеленді. Ал Жасмин Шорман 2023 жылы 9–11-сынып оқушылары арасында ұйымдастырылған «Мен Қазақстанды не үшін жақсы көремін?» шығармашылық байқауында II орын алып, жүлдегер атанды.

2024 жылы республикалық «Ақберен» өнер байқауының облыстық кезеңінде Кәмшат Жаманшалова III дәрежелі дипломмен марапатталды. Тағы бір жетістік – 8–11-сынып оқушыларына арналған республикалық «Абай оқулары» шығармашылық байқауында Нұрислам Нұрмұқановтың III дәрежелі дипломға ие болуы.

Айгүл Амангелдіқызының кәсіби жетістіктері де оның үнемі ізденіп, біліктілігін арттыруға ұмтылатынын көрсетеді. Ол «ХХІ ғасыр дағдылары: Педагогикалық шеберлік академиясы» халықаралық әдістемелік орталығы ұйымдастырған «Шамшырақ» халықаралық интернет-олимпиадасында II дәрежелі дипломға және «Тіл білгірі» халықаралық олимпиадасында I дәрежелі дипломға ие болды. 2024 жылы педагог «Дарын» ғылыми-практикалық орталығы ұйымдастырған қазақ тілі пәнінен «Педстарт» республикалық қашықтық олимпиадасының II дәрежелі дипломымен марапатталды.

«Мен үшін ұстаздық мамандықтағы ең құнды нәрсе – балалардың өз қабілеттерін ашып, өздеріне деген сенімі артып, алдына қойған мақсаттарына қол жеткізгенін көру. Әр оқушының жетістігі – бірлескен еңбектің, шыдамдылық пен табандылықтың нәтижесі. Мен балаларға білім беріп қана қоймай, туған тіл мен әдебиетке деген қызығушылығын оятуға, ойлануға, шығармашылықпен айналысуға және өз күшіне сенуге үйретуге тырысамын», – дейді Айгүл Қыдыбекова.

Мұғалімнің кәсіби қызметінде әріптестерімен тәжірибе алмасуға да ерекше орын беріледі. 2023 жылы Айгүл Қыдыбекова облыс педагогтеріне арналған қазақ тілі мен әдебиеті сабақтарында ақпараттық-коммуникациялық технологияларды қолдану тақырыбында шеберлік сағатын өткізді. Ал 2024 жылы Солтүстік Қазақстан облысы бойынша кәсіби даму институтының біліктілікті арттыру курстары тыңдаушыларына арналған көшпелі практикалық сабақ барысында өз тәжірибесімен бөлісті.

Оның тәжірибесі «Қала – ауыл» жобасы аясында Әлихан Бөкейхан атындағы №25 орта мектептің бес жылдығына орай ұйымдастырылған «Заманауи мектеп: оқыту мен тәрбиедегі сабақтастық арқылы бес жылдық жетістік» тақырыбындағы мектеп директорлары мен олардың орынбасарларына арналған облыстық семинар-практикумда да атап өтілді.

Оқушының әрбір дипломының артында ұстаздың үлкен еңбегі тұр. Оның ішінде дайындық, қолдау, баланың қабілетіне деген сенім және дер кезінде дұрыс бағыт-бағдар бере білу бар. Айгүл Амангелдіқызы Қыдыбекова үшін педагогикалық шеберлік тек өзінің жетістіктерімен емес, өзі білім беріп, өсіп-жетілуіне ықпал етіп жүрген шәкірттерінің табысымен де өлшенеді.