СҚО-да Мемлекет басшысының агроөнеркәсіп кешенін жаңғырту жөніндегі тапсырмалары қалай жүзеге асырылуда
Ауыл шаруашылығын дамыту, заманауи технологияларды енгізу, жұмыс орындарын ашу және тұрғындардың әл-ауқатын арттыру мәселелері Қазақстан Республикасы Президенті Қасым-Жомарт Тоқаевтың Жолдауын талқылауға арналған өңірлік активтің кездесуінде сөз болды. Жиында Солтүстік Қазақстан облысы әкімінің бірінші орынбасары Марат Тасмағанбетов сөз сөйлеп, Мемлекет басшысы белгілеген міндеттердің өңірде қалай жүзеге асырылып жатқанын баяндады, деп хабарлайды QZ NEWS тілшісі.
Президент Жолдауында аграрлық секторды дамытуға ерекше көңіл бөлінді. Еліміздегі жетекші ауыл шаруашылығы өңірлерінің бірі саналатын Солтүстік Қазақстан облысы үшін бұл бағыттың стратегиялық маңызы зор. Мұнда әңгіме тек өндіріс көлемін арттыру туралы емес, сонымен қатар еңбек өнімділігін жоғарылату, инвестиция тарту, қайта өңдеу саласын дамыту және цифрлық шешімдерді енгізу жөнінде болып отыр.
Тоғыз айдың қорытындысы бойынша өңірдегі ауыл шаруашылығының жалпы өнім көлемі 697,1 млрд теңгені құрап, 10,6%-ға өсті. Салаға 170,2 млрд теңге инвестиция тартылды. Өсім қарқыны бойынша облыс республикада екінші орынға шықты. Соңғы бес жылда еңбек өнімділігі үш есеге жуық артып, бір жұмыскерге шаққанда 12,3 млн теңгеге жетті.
Өсімдік шаруашылығын әртараптандыру жұмыстары жалғасуда. Майлы дақылдар алқабы 30%-ға ұлғайып, 1,3 млн гектарды құрады. Жалпы өнім жинау көлемі 1,4 млн тоннаға жетті. Ал астық түсімі гектарына орта есеппен 17 центнерден келіп, 4,9 млн тоннаны құрады.
Мал шаруашылығы да маңызды бағыттардың бірі болып қала береді. Облыста 118 сүт-тауарлы ферма жұмыс істейді. 2023–2025 жылдары жалпы құны 144,5 млрд теңге болатын 44 инвестициялық жоба жүзеге асырылды. Оның ішінде 32 сүт фермасы бар. Ұйымдасқан шаруашылықтарда сүт өндіру көлемі үштен бірге артып, 242,5 мың тоннаға жетті. Бұл көрсеткіш бойынша СҚО республикада бірінші орында.
«Біздің міндетіміз — ауыл шаруашылығы өндірісіндегі көшбасшылық позициямызды сақтап қана қоймай, шикізатты терең өңдеуге, еңбек өнімділігін арттыруға және экспорттық мүмкіндіктерді кеңейтуге бағытталған жоғары технологиялы агроөнеркәсіп кешеніне көшу», — деп атап өтті Марат Тасмағанбетов.
Бұл міндеттер инвестициялық жобалардан да көрініс табуда. «Евразиан Милк» ЖШС жылына 12 мың тонна қоюландырылған сүт өндіретін кәсіпорынды іске қосты. «Север Агро ЛТД» ЖШС құрғақ бие сүтін өндіру жобасын жүзеге асырды. Майлы шикізатты қайта өңдейтін жаңа өндірістік қуаттар салынуда. Сонымен қатар мал шаруашылығының тұрақты дамуына қажетті жемшөп базасын нығайту жұмыстары жүргізіліп жатыр.
Баяндаманың жеке бөлімі қаржыландырудың қолжетімділігі мен шаруашылықтарды технологиялық тұрғыдан жаңғырту мәселелеріне арналды. Биыл аграрлық секторды жеңілдетілген қаржыландыру көлемі 220 млрд теңгеден асты. «ҚазАгроҚаржы» АҚ арқылы машина-трактор паркін жаңартуға 81,8 млрд теңге бағытталды. Бұл 1429 бірлік техниканы сатып алуды қаржыландыруға мүмкіндік берді.
Цифрландыру да ауыл шаруашылығы мамандарының күнделікті жұмысының бір бөлігіне айналып келеді. Облыстағы ауыл шаруашылығы құрылымдарының 87%-ы заманауи технологияларды қолданады. Алдағы уақытта агроөнеркәсіп кешенінің бірыңғай цифрлық экожүйесін қалыптастыру жоспарланып отыр.
Баяндаманың екінші бөлігі халықтың табысын арттыру және әлеуметтік қолдау мәселелеріне арналды. 2026 жылдың екінші тоқсанында өңірдегі жұмыссыздық деңгейі өткен жылғы 4,4%-дан 4,2%-ға дейін төмендеді. Биыл денсаулық сақтау, білім беру, ауыл шаруашылығы және шағын бизнес салаларында 130-ға жуық жоба жүзеге асырылып, 800-ден астам жұмыс орны ашылды. Ал 2026–2031 жылдарға арналған жалдамалы жұмысшыларға болжамды қажеттілік 46 мың адамнан асады.
Маңызды әлеуметтік жобалардың бірі — төртінші тоқсанда мүмкіндігі шектеулі балаларға арналған 50 орындық жаңа оңалту орталығын ашу. Атаулы әлеуметтік қолдауды жетілдіру жұмыстары да жалғасуда. Жыл басынан бері облыстың 20 787 тұрғыны жалпы сомасы 1,1 млрд теңге болатын әлеуметтік көмек алды.
«Басты мақсат — өмірлік қиын жағдайға тап болған азаматтарға уақытылы көмек көрсетіп қана қоймай, олардың тұрақты табыс табуына және қоғам өміріне белсенді араласуына жағдай жасау», — деді облыс әкімінің бірінші орынбасары.
Қорытындылай келе, Марат Тасмағанбетов Жолдауда белгіленген міндеттерді орындау барлық саланың жүйелі жұмысын және үйлесімді іс-қимылын талап ететінін атап өтті. Басты нәтиже — өңірдің тұрақты дамуы мен солтүстікқазақстандықтардың өмір сүру сапасын арттыру болуы тиіс.