Газа секторынан Солтүстік Қазақстанға: палестиналық студент Kozybayev University-де медицина мамандығын оқиды
Kozybayev University-дің халықаралық студенттер қауымы тағы бір студентпен толықты. Палестинадан келген Фади Барбах медицина факультетінің бірінші курс студенті атанды. Ол бакалавриат бағдарламасы бойынша жоғары білім алады. Бұл туралы университеттің баспасөз қызметі хабарлады, деп жазады QZ NEWS.
Жас жігіт Солтүстік Қазақстанға Қазақстан Республикасы Ғылым және жоғары білім министрлігі жүзеге асыратын Study in Kazakhstan стипендиялық бағдарламасы аясында келді. Студенттік өмірге алғашқы қадам кампуспен танысу экскурсиясынан басталды. Фадиге оқу аудиториялары, денсаулық сақтау саласына арналған мамандандырылған зертханалар және болашақ медицина мамандарын даярлау үдерісінде қолданылатын заманауи жабдықтар көрсетілді. Сонымен қатар студент факультеттің профессорлық-оқытушылық құрамымен танысты.
«Мен Kozybayev University-дің медицина факультетінде болдым. Ең жаңа медициналық жабдықтармен және озық технологиялармен жабдықталған зертханалар мені шын мәнінде таңғалдырды. Сондай-ақ медициналық білім беру саласында мол тәжірибесі бар оқытушылармен танысу бақытына ие болдым. Осы университеттің студенті атанғаныма өте қуаныштымын және оқуымның басталуын үлкен ынтамен күтіп жүрмін», — деп бөлісті Фади Барбах.
Kozybayev University медицина факультетінде 600-ден астам студент білім алады. Халықаралық студенттерді қабылдау жалғасуда. Жақын уақытта Руанда, Пәкістан, Үндістан және Ираннан жастардың келуі күтіледі. Қараша айының соңында шетелдік студенттер оқуын бастайды.