Петропавлдағы такси жүргізушісінің дөрекілігіне қатысты шағым шетел азаматының Қазақстаннан шығарылуына себеп болды
Петропавл тұрғынының такси жүргізушісінің дөрекілігіне қатысты полицияға жазған шағымы миграциялық заңнаманы бұзған шетел азаматының Қазақстан аумағынан шығарылуымен аяқталды, деп хабарлайды QZ NEWS тілшісі.
Өтінішті тексеру барысында полиция қызметкерлері Тәжікстанның 42 жастағы азаматының заңсыз жолаушылар тасымалымен айналысқанын анықтады. Ол Қазақстанға кірген кезде келу мақсаты ретінде жұмысқа орналасу немесе кәсіпкерлік қызметпен айналысу ниетін көрсетпеген.
Бұған дейін ер адам осыған ұқсас құқық бұзушылық үшін жауапкершілікке тартылған. Мамандандырылған әкімшілік сот заң талаптарын қайталап бұзған жүргізушіге бір тәулікке әкімшілік қамаққа алу жазасын тағайындап, кейін Қазақстаннан шығару туралы шешім шығарды. Сонымен қатар оған бес жыл мерзімге елге қайта кіруге тыйым салынды.
«Жыл басынан бері Солтүстік Қазақстан облысында 679 шетел азаматы әкімшілік жауапкершілікке тартылды. Оның 633-і көші-қон заңнамасын бұзғаны үшін жауапқа тартылған. Қазақстан Республикасының аумағынан 45 шетел азаматы шығарылды. Сонымен қатар 152 шетел азаматының ел аумағында болу мерзімі қысқартылды», – деп хабарлады СҚО ПД.