Ауылға кадр: Қызылжар ауданында дәрігер тапшылығы қалай шешілуде?
Қызылжар ауданында жас медицина мамандарын ауылдық жерлерге тарту және оларды тұрақтандыру жұмыстары жалғасып жатыр. Мұнда ауылдық денсаулық сақтау саласын дамыту материалдық базаны жаңартумен қатар, кадр тапшылығы мәселесін шешуге бағытталған шараларды да қамтиды, деп хабарлайды QZ NEWS тілшісі.
Маңызды қадамдардың бірі – ауданның «Ауылдық денсаулық сақтауды жаңғырту» ұлттық жобасына қатысуы. Бүгінде 10 жаңа медициналық нысан пайдалануға берілді. Сонымен қатар ауысымына 250 адамды қабылдауға арналған аудандық емхана құрылысы жалғасып жатыр.
Медициналық желінің кеңеюі ауыл тұрғындары үшін медициналық көмектің қолжетімділігін арттырғанымен, дәрігерлер мен орта буын медицина қызметкерлерінің санын көбейтуді талап етеді.
Мамандарды тартудың негізгі тетіктерінің бірі – көтерме жәрдемақы. Жас медицина қызметкерлеріне төленетін қаражат жергілікті бюджет пен аудандық аурухана есебінен қарастырылған. Мұндай қолдау мамандарға еңбек жолының бастапқы кезеңінде көмек көрсетіп, ауылдық медицина саласын жас түлектер үшін тартымды ете түседі.
Мамандарды тұрғын үймен қамтамасыз ету мәселесі де өзекті. Ауданда жұмыс істеп тұрған емхана ғимараттарының бірін дәрігерлерге арналған қызметтік пәтерлерге қайта жабдықтау мүмкіндігі қарастырылып жатыр. Тұрғын үймен қамту жас мамандарды ауданға тартуға ғана емес, кәсіби болашағын осында байланыстыруға да қосымша мүмкіндік береді.
Медициналық инфрақұрылымның кеңеюіне қарай кадрларға деген қажеттілік те арта түспек. Алдағы уақытта аудан елді мекендерінде тағы төрт фельдшерлік-акушерлік пункт пен 14 медициналық пункт салу жоспарланып отыр.