Петропавлда жастар қарттар үйінің тұрғындарына көмек көрсетіп, дастархан жайды
Халықаралық қарттар күні қарсаңында Петропавлда «Аға буынға қамқорлықпен» атты игі акция өтті. Қалалық Жастар ресурстық орталығының белсенділері мен еріктілері «Надежда» қарттар үйінің тұрғындарына барып, мекеме аумағын тазалап, абаттандыру жұмыстарына көмектесті. Сондай-ақ жастар қариялармен уақыт өткізіп, жылы қарым-қатынас орнатып, көңіл бөліп, қамқорлық танытты, деп хабарлайды QZ NEWS тілшісі.
Іс-шараға қатысушылар тек құттықтаумен шектелмеді. Қажетті құрал-саймандарды қолға алған жастар әлеуметтік мекеменің ауласын ретке келтіріп, түскен жапырақтарды жинады, қоқыстарды тазалап, күтімді қажет ететін аумақтарды ретке келтірді. Мұндай көмек қарттар үйінің қызметкерлеріне үлкен қолдау болса, еріктілер үшін аға буын өкілдеріне жайлы жағдай жасауға өз үлесін қосуға мүмкіндік берді.
Акцияны Петропавл қаласының Жастар ресурстық орталығы «Көмек жақын» еріктілер қозғалысымен бірлесіп ұйымдастырды. Қалалық ЖРО басшысы Дамир Абдиннің айтуынша, мұндай кездесулер тек практикалық тұрғыдан ғана емес, жастарға үлкенді құрметтеуді үйрету тұрғысынан да маңызды.
«Қарт адамдарға қамқорлық бір ғана мерекелік күнмен шектелмеуі керек. Олар үшін көңіл бөлу, шынайы қарым-қатынас және өздерін ұмытпағанын сезіну аса маңызды. Жастарымыз бұл бастаманы қуана қолдады. Өйткені аздаған көмек пен бірге өткізген бірнеше сағаттың өзі адамға жақсы көңіл-күй сыйлай алады. Мұндай акциялар жастарды жанашырлыққа, жауапкершілікке және аға буынның өмірлік тәжірибесін құрметтеуге тәрбиелейді», – деді Дамир Абдин.
Тазалық жұмыстары аяқталған соң, қатысушылар ортақ дастархан басына жиналып, шай ішті. Жылы әрі еркін атмосферада жастар «Надежда» тұрғындарымен әңгімелесіп, олардың өмірлік оқиғаларын тыңдады және бірге сүйікті әндерін орындады. Ән мен сырлы әңгіме ешқандай ресмилікке орын қалмаған отбасылық мерекенің ерекше атмосферасын қалыптастырды.
Қарт адамдар үшін мұндай кездесулер күнделікті тіршіліктен бір сәт сергіп, жастардың ықыласы мен назарын сезінуге мүмкіндік береді. Ал еріктілер үшін бұл – мейірімділік пен жанашырлық туралы сөзбен айтып жеткізу мүмкін емес, адаммен тікелей қарым-қатынастан алынатын құнды тәжірибе.