Петропавлдағы балабақшада күйзелістің алдын алу үшін жасанды интеллект енгізілді
Петропавл қаласындағы «Балдаурен» бөбекжай-бақшасында педагогтерді қолдауға және күйзеліс деңгейін төмендетуге бағытталған ерекше эксперименттік жоба іске асырылды, деп хабарлайды QZ NEWS тілшісі.
Бастама 2025 жылғы 1 қыркүйекте қалалық білім бөлімінің бұйрығы негізінде қолға алынған. Бағдарламаны іске қосуға мектепке дейінгі білім беру саласындағы кадр тапшылығы мен тәрбиешілерге түсетін эмоционалдық жүктеменің артуы себеп болған.
Экспериментке қатысу үшін мекеме жасанды интеллект технологияларын енгізді. Қазіргі таңда жүйе балабақша аумағында орнатылған 35 цифрлық бейнекамерамен біріктірілген. Техникалық қолдауды 2024 жылдың қараша айынан бастап қайырымдылық негізде қазақстандық Protector AI компаниясы көрсетіп келеді.
Балабақша директоры Мадина Дарбаева бастапқыда цифрлық шешімдер ықтимал агрессия белгілерін анықтау үшін қолданылғанын, кейін жүйенің мүмкіндігін кеңейту туралы шешім қабылданғанын айтты.
«Алғашында жүйе агрессия фактілерін тіркейтін. Алайда толыққанды қауіпсіз орта қалыптастыру үшін бұл жеткіліксіз болды. Қазір камералар педагогтердің эмоционалдық жағдайын бейберекет мазаламай бақылап, жұмыс күні барысында қызметкерлерде пайда болатын микроэмоцияларды талдайды», — деді ол.
Мекеме басшылығының айтуынша, жүйе жұмыс істеген уақыт ішінде қызметкерлер тарапынан балаларға қатысты бірде-бір дөрекі әрекет тіркелмеген. Сонымен қатар технология ұжымдағы психологиялық ахуалды жақсырақ түсінуге және шаршау мен эмоционалдық күйзеліс белгілеріне дер кезінде назар аударуға мүмкіндік берген.
Жобаға Солтүстік Қазақстан облыстық Салауатты өмір салтын қалыптастыру орталығы да қосылды. Мекеме мамандары қызметкерлердің эмоционалдық жағдайына тегін диагностика жүргізіп, кейін кәсіби күйзелістің алдын алуға арналған екі айлық тренингтер мен тақырыптық кездесулер ұйымдастырған. Санитарлық-ағарту жұмыстары бөлімінің дәрігері Лариса Михалёва цифрлық технологиялар мамандардың кәсіби бағасын толық алмастыра алмайтынын атап өтті.
«Камера адамның эмоционалдық жағдайын 100 пайыз дәл анықтай алмайды, себебі көңіл күйге көптеген сыртқы фактор әсер етеді. Сондықтан біз қосымша тестілеу мен бірқатар тренинг өткізіп, қызметкерлердің психологиялық жағдайын тереңірек зерттеуді жөн көрдік. Диагностика қорытындысы бойынша күрделі мәселелер анықталған жоқ. Дегенмен эмоционалдық күйзелістің алдын алу мақсатында қалпына келуге арналған арнайы кеңістік құру идеясын қолдадық», — деп түсіндірді ол.
Жобаның басты нәтижелерінің бірі — эмоционалдық қалпына келтіру ХАБының ашылуы болды. Бұл педагогтерге арналған арнайы аймақ, онда қызметкерлер жұмыс күні барысында демалып, күш жинап, күйзеліс деңгейін төмендете алады. Ұйымдастырушылардың айтуынша, мұндай тәжірибе Қазақстанда алғаш рет енгізіліп отыр.
Эксперимент Қазақстан Республикасы Оқу-ағарту министрлігінің де қызығушылығын тудырды. Ведомство жобаға қатысты материалдар мен құжаттарды сұратқан. Егер жоба нәтижелері сәтті деп танылса, солтүстікқазақстандық балабақшаның тәжірибесін келесі оқу жылынан бастап еліміздің өзге өңірлеріне тарату жоспарланып отыр.