Петропавлдық ардагерлер Халықаралық қарттар күні құрметке бөленді
Петропавл қалалық мәдениет үйінде аға буын өкілдері, еңбек ардагерлері мен қоғам белсенділері Халықаралық қарттар күні құрметке бөленді. Бұл күні қарияларға алғыс сөздер айтылып, концерттік бағдарлама ұйымдастырылып, бірқатар азамат марапатталды, деп хабарлайды QZ NEWS тілшісі.
Жиынға қатысушыларды құттықтаған Петропавл қаласы әкімінің әлеуметтік мәселелер жөніндегі орынбасары Айнұр Шаймерденова қазіргі қаланың келбеті бірнеше буынның еңбегімен қалыптасқанын атап өтті.
«Бұл – ерекше мереке. Бұл – еңбегімен, білімімен және тәжірибесімен қаламыздың қалыптасуы мен дамуына үлес қосқан жандарға тағы да алғыс айтуға мүмкіндік беретін күн. Әрбір үйдің, мектептің, аурухананың, кәсіпорынның, әрбір көшенің артында бірнеше буын петропавлдықтардың еңбегі тұр. Араларыңызда ондаған жылдар бойы кәсіпорындарда еңбек еткен, бала оқытқан, адамдарды емдеген, үй салған, қаланы жылу және сумен қамтамасыз еткен, мәдениет пен спортты дамытуға үлес қосқан азаматтар бар. Сіздер – халқымыздың үздік дәстүрлерінің даналығын сақтаушыларсыздар әрі жастарымызға үлгі боларлық өнегелі жандарсыздар», – деді Айнұр Шаймерденова.
Ол аға буынға құрмет көрсету – Қазақстан қоғамындағы маңызды дәстүрлердің бірі екенін атап өтті. Қала әкімінің орынбасарының айтуынша, дәл осы аға буын өкілдері қаламыз бен еліміздің одан әрі дамуына негіз қалады.
Бүгінде Петропавлда 45 мыңнан астам зейнеткер және 982 тыл еңбеккері тұрады. Мерекелік шара барысында қарттар мен мүгедектігі бар азаматтарды әлеуметтік қолдауға арналған айлықтың басталғаны жарияланды.
«Бұл – қоғамның бар назары ел мен қала игілігі үшін ғұмырын еңбекке арнаған жандарға бағытталатын маңызды кезең. Бұл сандар жай ғана статистика емес. Әр адамның тағдырында ерлік, табандылық, жанқиярлық және баршаға үлгі боларлық өнеге жатыр. Сіздердің өмір жолдарыңыз – даналық пен адамдық қадір-қасиеттің мектебі. Сіздер кейінгі буынға тек білім мен тәжірибені ғана емес, Отанға деген сүйіспеншілік, еңбекқорлық, құрмет пен жауапкершілік секілді аса маңызды құндылықтарды да жеткізесіздер», – деді Айнұр Шаймерденова.
Қалалық ардагерлер кеңесінің төрағасы Жангелді Тәжин де аға буынның тәуелсіз Қазақстан тарихындағы айрықша рөліне тоқталды. Ол аға буын өкілдерінің елдің қалыптасуының күрделі кезеңдерінен өтіп, бірлікті сақтауға және мемлекеттің дамуына елеулі үлес қосқанын атап өтті.
«Халқымызда «Қариясы бар елдің – қазынасы бар» деген сөз бар. Бүгінгі жетістіктеріміздің барлығы дерлік аға буынның, ардагерлеріміздің еңбегінің арқасында мүмкін болды. Тәуелсіздіктің алғашқы жылдарында барлық қиындықтарға қарамастан, аға буын еліміздің бірлігін сақтап, бүгінгі күнге жетуімізге өз үлесін қосты. Сол үшін сіздерге зор алғысымызды білдіреміз», – деді Жангелді Тәжин.
Ол ұрпақтар сабақтастығын сақтап, жастарға жинақтаған білім мен өмірлік тәжірибені жеткізудің маңызына тоқталды.
Мерекелік кездесу концерттік бағдарламамен жалғасты. Ардагерлерге музыкалық нөмірлер ұсынылып, басқосу қариялардың бір-бірімен жүздесіп, достары және әріптестерімен пікір алмасуына мүмкіндік берді.
Шара барысында аға буын өкілдерінің бірқатарына «Әділет» партиясының, қалалық ардагерлер кеңесінің және Петропавл қаласы әкімдігінің алғыс хаттары мен марапаттары табысталды.
Айлықтың ашылуы қарт адамдарға деген қамқорлық пен құрмет тек атаулы күндермен шектелмеуі керектігін тағы бір еске салды.