Саумалкөл ауылында оқушыларға діни экстремизмнің алдын алу туралы түсіндірілді
Саумалкөл ауылында №1 орта мектептің 11-сынып оқушыларымен жастар арасында діни экстремизм мен терроризмнің алдын алуға арналған ақпараттық кездесу өтті, деп хабарлайды QZ NEWS тілшісі.
Жергілікті атқарушы органдар өкілдерінің қатысуымен ұйымдастырылған кездесуге 20-дан астам жоғары сынып оқушысы қатысты. Мамандар жасөспірімдермен қауіпсіздік мәселелерін талқылап, «экстремизм» және «терроризм» ұғымдарына жан-жақты түсінік берді. Сондай-ақ олардың қоғамға тигізетін кері әсері туралы айтып өтті.
Оқушыларға қазіргі әлемдегі негізгі қауіп-қатерлер түсіндіріліп, деструктивті және дәстүрлі емес діни ағымдарға тартылу қаупін ерте анықтауға қатысты пайдалы кеңестер берілді.
Кездесу ашық диалог форматында өтті. Мектеп оқушылары мамандарға өздерін қызықтырған сұрақтарын қойып, пікірлерін білдірді және жан-жақты жауаптар алды.
Ұйымдастырушылардың айтуынша, Айыртау ауданындағы білім беру ұйымдарында профилактикалық жұмыстар жүйелі түрде жалғасын табады.