СҚО-дағы жол апатынан зардап шеккендер туралы не белгілі

Солтүстік Қазақстан облысының Денсаулық сақтау басқармасы Петропавл – Көкшетау тасжолында бес көлік соқтығысқан жол апатынан аман қалғандардың жағдайы туралы мәлімет берді, деп хабарлайды QZ NEWS тілшісі.

СҚО-ның Тайынша ауданында болған ірі жол апатынан зардап шеккен әйелдің жағдайы ауыр. Ол өкпені жасанды желдету аппаратына қосылған. Ал ер адамның жағдайы орташа ауыр деп бағаланып отыр. Науқастардың жағдайы туралы жаңа мәліметті СҚО Денсаулық сақтау басқармасының баспасөз хатшысы Гүлнар Қалиева ұсынды.

Екі зардап шегуші де Тайынша көпбейінді ауданаралық ауруханасында жатыр. Ер адам хирургия бөлімінде ем қабылдап жатыр, ал әйел жансақтау бөлімінде дәрігерлердің бақылауында. Медицина қызметкерлері оларға қажетті көмекті жалғастыруда.

Еске салайық, жол апаты 15 қазан күні таңертең Тайынша ауданына қарасты Кременчуг ауылының маңында, Петропавл – Көкшетау тасжолында болған. Бес көлік соқтығысқан: үш жеңіл автокөлік және екі КамАЗ жүк көлігі. Жол апаты салдарынан Audi көлігінің үш жолаушысы қаза тапты.

Кейін қаза тапқандардың арасында Жамбыл ауданының Пресновка ауылындағы балабақша меңгерушісі мен екі тәрбиешінің болғаны белгілі болды. СҚО Білім басқармасының мәліметінше, әйелдер жеке сапарға шыққан. Олардың жол жүруі кәсіби қызметіне байланысты болмаған.

Audi көлігінің жүргізушісі мен әйел жолаушы жарақат алып, ауруханаға жеткізілді. Қазіргі уақытта жол апатының мән-жайы мен себептері сотқа дейінгі тергеп-тексеру аясында анықталып жатыр.