Мадина Дарбаева: «Біз әр баладан ең алдымен жеке тұлғаны, оның мүмкіндіктері мен қабілеттерін көре білуіміз керек»
Әр баланың өз қабілетін ашып, дербестікке үйренуіне жағдай жасау – қазіргі білім беру жүйесінің маңызды міндеттерінің бірі. Бұл ретте ерекше білім беру қажеттіліктері бар балаларға қамқорлық көрсету балабақша қабырғасымен ғана шектелмейді. Ол мемлекет, педагогтер мен қоғамның бірлескен қолдауын талап етеді. Бұл туралы Президенттің Қазақстан халқына Жолдауына пікір білдірген «Балдаурен» бөбекжай-бақшасының меңгерушісі Мадина Дарбаева айтты. Бұл туралы QZ NEWS тілшісі хабарлайды.
Мектепке дейінгі білім беру ұйымының басшысы инклюзивті білім беруді одан әрі дамытуға ерекше мән беру қажет деп санайды. Ерекше білім беру қажеттіліктері бар балаларды тәрбиелеп отырған отбасылар үшін мамандардың болуы ғана емес, баланың өсуінің әр кезеңінде қажетті көмек пен қолдауға ие болатынына сенімді болу да маңызды.
«Ата-аналар үшін ең бастысы – баласының қиындықпен бетпе-бет жалғыз қалмайтынын, оның дербестікке қарай алғашқы қадамдарын жасауына көмектесетін жандар әрдайым жанынан табылатынын түсіну. Ол үшін педагогтердің кәсіби даярлығымен қатар, шыдамдылық, зейін мен әр балаға жеке көзқарас қажет. Біз әр баладан ең алдымен жеке тұлғаны, оның мүмкіндіктері мен қабілеттерін көре білуіміз керек», – деп атап өтті Мадина Дарбаева.
Балабақша меңгерушісі Президент Жолдауында қозғалған тағы бір маңызды бағыт ретінде жас мамандардың жұмыс істеуі мен өмір сүруіне қолайлы жағдай жасауды атады. Оның айтуынша, білім беру ұйымдарының кадрлық тұрақтылығы жас педагогтердің өз кәсібінде қаншалықты сенімді сезінетініне және болашағын жоспарлай алуына тікелей байланысты.
«Жас маман өз еңбегінің қажет екенін, бағаланатынын, кәсіби тұрғыдан өсумен қатар, тұрмыстық мәселелерін де шешуге мүмкіндігі бар екенін сезінуі маңызды. Адам туған өңірінде өмірін жайластыруға мүмкіндік бар екенін көргенде, болашағын осы өлкемен байланыстыруға деген ынтасы арта түседі. Ал бұл балалардың өз ісіне қызығушылықпен қарайтын әрі мамандығында ұзақ жылдар бойы қалатын педагогтерден білім мен тәрбие алуына жол ашады», – деп есептейді бөбекжай меңгерушісі.
Мадина Дарбаеваның айтуынша, әлеуметтік инфрақұрылымды дамыту мен педагог кадрларды қолдау білім беру жүйесінің өзін жетілдірумен қатар жүруі тиіс. Өйткені кез келген мемлекеттік бастаманың түпкі мақсаты – жаңа мүмкіндіктерге ие болатын адамдардың, яғни балалардың, ата-аналар мен ұстаздардың өмір сапасын жақсарту.