СҚО-да Польша Сенатының Маршалының сапары аясында «Қазақ халқына алғыс» ескерткіші ашылды
Солтүстік Қазақстан облысына ресми сапармен Польша Республикасының Сенат Маршалы Малгожата Кидава-Блоньска бастаған жоғары деңгейлі делегация келді. Бұл туралы СҚО әкімі Ғауез Нұрмұхамбетов өзінің Telegram-арнасында хабарлады. Екіжақты кездесу барысында тараптар сауда-экономикалық байланыстарды нығайту перспективаларын және бірлескен инвестициялық жобаларды іске асыру мәселелерін талқылады, деп хабарлайды QZ NEWS тілшісі.
Қазақстан мен Польша арасындағы дипломатиялық қатынастарға 34 жылдан астам уақыт болды. Алайда Солтүстік Қазақстан облысы үшін бұл сапардың тарихи маңызы ерекше. Қазіргі таңда өңірде республикадағы этникалық поляктардың 30 пайыздан астамы тұрады, ал олардың ең тығыз қоныстанған орталығы дәстүрлі түрде Тайынша ауданы болып саналады.
Сапардың маңызды сәттерінің бірі поляк делегациясының Тайынша ауданында өткен еске алу шараларына қатысуы болды. Іс-шаралар поляктардың Қазақстанға жер аударылғанына 90 жыл толуына арналды.
– Мұнда қазақ халқының қиын-қыстау кезеңдерде көрсеткен мейірімділігі, өзара көмегі мен қонақжайлылығына деген ризашылықтың белгісі саналатын «Қазақ халқына алғыс» ескерткішінің ашылуы өтті, – деп жазды СҚО әкімі өзінің Telegram-арнасында.
Өңір басшысы мұндай мәртебелі делегацияның сапары гуманитарлық байланыстарды нығайтып қана қоймай, Солтүстік Қазақстан облысы мен Польша өңірлері арасындағы экономикалық және инвестициялық ынтымақтастыққа жаңа серпін беретініне сенім білдірді.