Петропавлдық такси жүргізушісі зейнеткерді алаяқтардың құрбаны болудан сақтап қалды
Петропавлда такси жүргізушісі жолаушысының алаяқтарға алданып жатқанын сезіп, полицияға хабарласқан. Егде жастағы әйелдің шотындағы барлық ақшасын шешіп алмақ болғанын байқаған ер адамның қырағылығының арқасында 73 жастағы зейнеткер интернет-алаяқтардың кезекті құрбаны болудан аман қалды, деп хабарлайды QZ NEWS тілшісі.
Қала тұрғынына белгісіз біреудің телефон соғуынан кейін оқиға басталған. Қоңырау шалған адам өзін белгілі байланыс операторының қызметкері ретінде таныстырып, зейнеткердің келісімшартының мерзімі аяқталып келе жатқанын айтқан. Оны ұзарту үшін келісімін растап, SMS арқылы келген кодты хабарлау жеткілікті екенін түсіндірген.
Әйел алаяқтарға көмектесіп жатқанын сезбей, олардың өтінішін орындаған. Осылайша қаскөйлер алдаудың келесі кезеңіне дайындалған.
Келесі күні зейнеткерге тағы да қоңырау шалған. Бұл жолы белгісіз адамдар оның атына бес миллион теңге несие рәсімделгенін айтқан. Қарызды жою және жинақтағы ақшаны қорғау үшін депозиттегі қаражатты шешіп алып, шартты түрде «қауіпсіз мемлекеттік шотқа» аударуды ұсынған.
«Сіздің атыңызға бес миллион теңге несие рәсімделіп қойған», – деп сендірген алаяқтар.
Зейнеткер қоңырау шалғандарға сеніп, банкке баруға шешім қабылдаған. Тіпті таксиді де оған алаяқтардың өздері шақырып берген. Алайда бұл жолы олардың жоспары жүзеге аспады.
Көлік тізгінінде жеке кәсіпкер отырған. Оның айтуынша, бұған дейін TikTok әлеуметтік желісінен телефон алаяқтары туралы ескерту бейнероликтерін көрген. Жолаушысының телефонмен сөйлескені және ақшаны не үшін шешіп алмақ болғанын түсіндіруі ер адамға күдік туғызған.
«Әжейден не болғанын, не істемек екенін сұрай бастадым. Ол ақша шешіп алып, немересіне сыйлық жасағысы келетінін айтты. Бірақ мұның бәрі маған күмәнді көрінді. Банкке келген соң ішке кіріп, менеджерге барып, әйелді бақылап қоюды өтіндім», – деді жүргізуші.
Банк қызметкерлері де жағдайға назар аударған. Олар зейнеткерге алаяқтардың арбауына түсуі мүмкін екенін түсіндірген. Алайда әйел ескертулерге бірден сене қоймаған. Өйткені алаяқтар алдын ала оның бөгде адамдарға сенбеуіне ықпал етіп, араласуға тырысатындардың өздері қылмыскерлердің сыбайластары болуы мүмкін екенін айтқан.
Сонда такси жүргізушісі жай ескертумен шектелмей, 102 нөміріне қоңырау шалған. Оқиға орнына келген полицейлер әйелге алаяқтардың нысанасына айналғанын және барлық жинағынан айырылып қалуы мүмкін болғанын түсіндірді.
СҚО Полиция департаментінің мәліметінше, 2026 жылдың тоғыз айында өңірде 404 интернет-алаяқтық дерегі тіркелген. Ал өткен жылдың сәйкес кезеңінде мұндай 589 қылмыс анықталған.
Полиция тіркелген алаяқтық деректерінің азаюын профилактикалық жұмыстардың нәтижесімен де байланыстырады.