Деструктивті идеологиядан қалай қорғануға болады: СҚО жастарына практикалық кеңестер берілді
Петропавлдағы Ғабит Мүсірепов атындағы кітапханада республикалық «Заң және тәртіп» идеологемасы аясында «Ашық мүмкіндіктер диалогы: заң, адалдық, қауіпсіздік» тақырыбында кездесу өтті. Жиын жастардың құқықтық және ақпараттық қауіпсіздігі мәселелеріне арналды, деп хабарлайды QZ NEWS тілшісі.
Кездесуге қала жастары мен студенттер қатысты. Ашық форматта олар заң талаптарын сақтау, өз құқықтарын қорғау, сыбайлас жемқорлықтың, буллингтің алдын алу, сондай-ақ жастардың ақпараттық ортада тап болуы мүмкін қауіптерді талқылады.
Кездесуде СҚО бойынша Адам құқықтары жөніндегі уәкіл Жанат Жұмабаев, облыс әкімі аппаратының Әдеп жөніндегі уәкілі Екатерина Әубәкірова және Дінаралық қатынастарды талдау және дамыту орталығының теологы Елизавета Березина сөз сөйледі.
Әңгіме тек заң нормалары туралы емес, алған білімді күнделікті өмірде қалай қолдану керектігі жөнінде де өрбіді. Деструктивті идеология белгілерін тану, экстремистік және террористік әрекетке тартылудың алдын алу, сондай-ақ интернеттегі қауіпсіз мінез-құлық мәселелеріне ерекше назар аударылды.
СҚО Жастар ресурстық орталығының басшысы Анастасия Волкованың айтуынша, мұндай кездесулер жастардың мамандармен тікелей байланыс орнатуына мүмкіндік береді.
«Жастардың ақпаратты жай ғана тыңдап қоймай, ашық түрде сұрақ қойып, нақты жауап алғаны біз үшін маңызды. Құқықтық сауаттылық пен өз әрекетіне жауапкершілікпен қарау – қоғамдағы қауіпсіз мінез-құлықтың негізі», – деді Анастасия Волкова.
Кездесудің практикалық бөлімінде жастардың оқу, жұмыс, отбасы немесе әлеуметтік желілерде тап болуы мүмкін түрлі жағдайлар талқыланды. Мамандар ықтимал қауіпті жағдайларды қалай анықтауға және көмек алу үшін қайда жүгінуге болатынын түсіндірді.
Буллингтің алдын алу тақырыбына да жеке тоқталды. Қоғамдық даму және ақпарат орталығының маманы Арам мұндай жағдайларды назардан тыс қалдырмаудың маңызды екенін атап өтті.
«Біз жастар мен студенттер үшін кездесу өткізіп, шын мәнінде маңызды мәселелер – заң, қауіпсіздік, отбасылық қарым-қатынас және жауапкершілік туралы айтып отырмыз. Жастарға өз құқықтарын білуге, ықтимал қауіптерді тани білуге және қиын жағдайда көмек алу үшін қайда жүгіну керектігін түсінуге қажетті пайдалы ақпарат бердік», – деді Арам.
Кездесу барысында қатысушылар өздерін толғандырған сұрақтарды қойып, түрлі өмірлік жағдайларда қалай әрекет ету керектігі жөнінде мамандардан кеңес алды.