Петропавлда оқуды мектеп оқушыларының күнделікті өмірінің бір бөлігіне айналдыру жолдары талқыланды

Петропавлда педагогтер, кітапханашылар, білім және мәдениет саласының мамандары, мектеп оқушылары мен белсенді оқырмандар балалар мен жастардың оқырмандық мәдениетін қалыптастырудың заманауи тәсілдерін, сондай-ақ мектеп пен кітапхана арасындағы ынтымақтастық мүмкіндіктерін талқылады. Кездесу Сәбит Мұқанов атындағы Солтүстік Қазақстан облыстық әмбебап ғылыми кітапханасында өтті, деп хабарлайды QZ NEWS тілшісі.

«Оқитын ұлт» республикалық бастамасы аясында «Мектеп және кітапхана: оқырман тәрбиелеу» атты ғылыми-практикалық конференция ұйымдастырылды. Кәсіби кездесудің басты тақырыбы – қазіргі оқушылардың қанша кітап оқитыны ғана емес, оқуды олардың күнделікті өмірінің табиғи әрі маңызды бөлігіне айналдырудың жолдары болды.

Өз тәжірибелерімен Петропавл мен облыстағы білім беру ұйымдары мен кітапханалардың өкілдері бөлісті. Педагог, қалалық білім бөлімінің әдіскері Бақыт Қалижарова оқырманды кітапхана өмірінің белсенді қатысушысына айналдыруға көмектесетін ойын технологиялары туралы айтып берді. «ЛОРД» мектеп-лицейінің орыс тілі мен әдебиеті пәнінің мұғалімі, филология ғылымдарының кандидаты Ольга Васильева «Біз кітапханаға қайта ораламыз» тақырыбында баяндама жасады.

Баланың кітапқа деген қызығушылығын ерте жастан қалыптастыру туралы Ғабит Мүсірепов атындағы облыстық балалар-жасөспірімдер кітапханасының кітапханашысы Гүлжауһар Жақан айтып берді. Ал облыстық әмбебап ғылыми кітапхананың оқу залдары бөлімінің басшысы Наталья Чуряк кітапхананы оқырмандық мәдениетті қалыптастыратын заманауи кеңістік ретінде таныстырды.

«Заманауи кітапхана – кітаптар сақталатын орын ғана емес. Бұл – қарым-қатынас, жаңалық ашу және тұлғалық даму кеңістігі. Біздің міндетіміз – әр бала өзіне қызықты кітапты тауып, кітап оқудан ләззат алатындай және кітапхананың өмірінің маңызды бөлігіне айнала алатынын түсінетін жағдай қалыптастыру», – деді Наталья Чуряк.

Қатысушылар мектеп кітапханалары мен педагогтердің өзара іс-қимылына ерекше назар аударды. Бірінші гимназияның кітапхана меңгерушісі Дина Шатохина мен орыс тілі және әдебиеті пәнінің мұғалімі Маргарита Дауэр оқушыларды кітап оқуға тарту бойынша бірлескен тәжірибелерімен бөлісті. Оның ішінде «ай кітабын» таңдаудан бастап, тұрақты оқырмандық әдет қалыптастыруға дейінгі жұмыстар қамтылды.

Оқушыларды кітап оқуға баулу әдістері туралы Абай атындағы мамандандырылған қазақ мектебі-гимназиясының кітапханашысы Райгүл Байматова да айтып берді. Ал педагогтердің кәсіби дамуын кітапхана арқылы сүйемелдеу мәселесін «Өрлеу» біліктілікті арттыру ұлттық орталығының Солтүстік Қазақстан облысы бойынша жетекші маманы Ботагөз Бердикеев көтерді.

Кездесудің маңызды бөлігі – оқырмандардың өз пікірі болды. 10 және 11-сынып оқушылары Махаббат Абай мен Әділ Мұхамадиев кітап оқуға, кітаптың маңызына және заманауи кітапхананың мектеп оқушысының өміріндегі рөліне қатысты өз көзқарастарын ортаға салды.

Баяндамалар әдебиетке деген қызығушылықты қалыптастыру педагогтер, кітапханашылар, ата-аналар мен балалардың бірлескен күш-жігерін қажет ететінін көрсетті. Мұғалім кітаптан білім мен мағына көзін көруге көмектессе, кітапханашы оқушының шын мәнінде қызығушылығын оятатын шығарманы табуға бағыт береді. Ал оқырман біртіндеп мәдени өмірдің белсенді қатысушысына айналады.

«Оқырман тәрбиелеу – кітап оқуға мәжбүрлеу емес, кітапты жақсы көруге көмектесу» – конференцияның басты ұстанымы осы болды.

Кездесу соңында қатысушылар қорытынды жасап, кәсіби тәжірибелерімен және идеяларымен алмасты. Жиынға қатысушыларға сертификаттар мен Алғыс хаттар табысталды.